Juve kulhpui Buffon

Gianluigi Buffon-a'n Juventus tan goalkeeper ropui a nih zia a lantir leh ta. Buffon chet ṭhat nia goal awm chhun hi substitute Juan Cuadrado khung niin khualmulah Lyon chu 1-0 in an hneh.

Massimiliano Allegri nauten an zin chhuahna hmunah beisei angin an khel chhuak thei lo a, forward Alexandre Lacazette-a penalty pet chu Buffon-a'n a dan sak bakah Italian goalkeeper hian Nabil Fekir goal khung tur chu ropui takin a dang bawk - player naran tana tih theih loh a ni.

Juve midfielder Mario Lemina chu minute 54-na lekah yellow card vawi hnih hmuh vangin hnawhchhuah a ni a, player 10 a khel Juve tan Cuadrado chuan Lyon defender a tlanpelh hnuah hnai set sawt aṭangin he inkhela goal awmchhun hi a hlap lut.

Allegri chuan, "Match thum kan khelh aṭangin point sarih kan hmu ta a, a chhe lem loah a ngaih theih. A pawimawh zawk chu goal kan la chhuah lo hi a ni a, zanina kan goal kan venhim theih chhan chu Buffon vang a ni," tiin veteran keeper a fak.

Kum 38-a upa Buffon hian club leh ram tana a match hnuhnung pahnihah a chetsual vangin goal a chhuah ve ve a, sawisel a hlawh. Tunah erawh a theihna san zia leh mi bik a nih zia khawvel hmuhah a polang chiang hle.

Group G inkhel dangah Manchester City aṭanga loan hmanga an hawh Samir Nasri goal hmangin Sevilla chuan Russian club Dinamo Zagreb 1-0 in an hneh.

French midfielder Nasri hian Spa-nish club tan hian tun season-ah goal thum a khung tawh a, season hmasaa City tan a goal khung zat aiin goal khatin a tam der tawh.