Buaina ram aṭangin zalenna ramah goal nen!

Kum hnih liam taah kha chuan raltlan satliah ve mai a ni a, tu khaw khain tu nge a nih an hre lo a, an ngaihsak hek lo. Vawiinah erawh Europe-a league ṭha zinga mi Bundesliga-ah meuh goal a khung tawh a, football khawvelin a chanchin an ngaihven - a hming chu Ousman Manneh a ni.

Kum 19-a upa, Gambia ral-tlan striker hian Inrinni khan a club Werder Bremen-in Bayer Leverkusen an hnehna inkhelah chakna goal a khung a, mittui nena a goal khung a lawm lai chu tu tan pawh hmuhnawm a tling - mumang ram kha a tak ram an chang ta si a!

Zinkawng chu

Werder Bremen striker duh-awm hian a hun hmasa kum 17 chhung zet chu dictator rorelna hnuaia awm Gambia-ah hun a hmang a, an ram khawpui pakhat Bakau-a USA lam company-in an din Rush Soccer Academy-ah training a nei ṭhin.

Rawlthar lungmawl mai mah ni se Africa khawmualpuia dictator-a rorelna, ram rethei tak ni bawkah chuan Manneh-a'n a tan hmasawnna tur a awm lo tih a hai lo a, Europe lam hawiin a ke a pen. A chhungte zawng zawng kalsanin a puanthuah a tel a, kum 17 leka upa ni mah se rilru huaisen tak pu chungin Germany a pan.

Manneh hian an ram hrehawm tak a kalsan hnuah Bremen khawpui a thleng a, he khawpui chhunga raltlan ho an dahna hmunah a hun hmasa lam a hmang. Football a ngainatnain kiansan a tum lo a, trial a neih hnuah fifth division club Blumenthaler SV Under 18 a zawm.

Kawng a inhawng

Manneh-a'n a league hmasa ber chu Germany-a youth league sang ber dawttuah Blumenthaler SV U19 tan a khel a, match 11 lek a inlanah goal 15 tehmeuh a khung - German club tam tak chil a ti put nghal a, amah duhtu zingah Bundesliga club an awm nawk! FC St. Pauli, Hamburg, Schalke 04, Wolfsburg leh Werder Bremen ten an club-a lakluh an duh laiin Manneh-a'n raltlan satliah mai a nih laia a innghahna khawpui Bremen club zawm a thlang a, March 2015 khan contract ziakin duh a thlang sual lo.

July 25, 2015-ah club reserve team tana khelin third division inelnaah a match hmasa ber a khel a, ni li hnuah first team tana a match hmasa ber khel nghalin friendly match-a SV Wilhelmshaven an hmachhawnna inkhelah minute 60-naah tlan luhtir a ni. Gambian striker hian Bremen coach-te duhthlanga an buai theih nan chhanna a pe nghal a, 7-0 a an chakna inkhelah hian minute 15 chhung lekin goal li a khung nghal.

Hello Bundesliga

September 18, 2016-ah Wer-der Bremen-in an coach Viktor Skry-pnyk an ban a, coach thar atana an ruat chu reserve team coach Alexander Nouri a ni. German coach hian Bundesliga a luhchilh rualin Bremen B team-a a match hmasa pasariha a goal hnih leh assist vawi hnih neitu Manneh chu senior team-ah a ko nghal a, September 26 khan a match hmasa ber khelhtir a ni.

Match hnih dang a khelh leh hnuah Manneh-a'n Leverkusen a hmachhawn a, goal a khung ta hial. Kum 19-a upa striker chuan, "Ka awih thei lo a ni. Hei hi a taka thil thleng nge a nih a, mumang ramah ka la cheng mek zawk? Ka hun tawnah hei aia ropui hi a la awm lo. Ka coach Nouri chungah hian lawmthu sawisen loh ka ba a ni," tiin a hlim hle.

Manneh chuan sawi chhun-zawmin, "Ka rilru puthmang hi sawifiah thiam a har em em zawk a ni. Bundesliga-ah match li chiah ka la khel a, heti chung hian Gambian player zinga Bundesliga match li khel tling thei hmasa ber ka ni. Hei ringawt paw hi inchhuanna tham a tlin tawh tehlul nen tunah chuan Gambian player Bundesliga-a goal khung hmasa ber ka ni leh ta," a ti.

Lo lungphang suh Chunnu!

Kum 19-a upa striker chuan Gambia lama a chhungte chung-chang sawilangin, "Nitin mai hian ka nu nen kan inbe reng ṭhin a, min chhuang em em a ni. Mahse, football lampang hi hriat a nei tlem hle a, eng ang chiahin nge he hmunah hian ka awm tih chu midangin an hrilhfiah
ṭhin. Engtiklai pawhin min ngaihtuah viau reng a, kei lahin he hmun hi nuam ka ti tawlh tawlh thung a ni," tiin an ram rethei ve tak lama a nu te dinhmun a sawi.

Manneh chuan a player ngaih-san chu Manchester United striker hlui, Bayer Leverkusen lama khel ta Javier Hernandez a nih thu sawiin, "Player ngaihsan tak tak ka nei nual a, chung zingah chuan Chicharito a tel. Tun thleng hian Chicharito nen kan inhmachhawn ve ta hial kha ka la awih thei lo a ni. Striker dang hming kan lam ri dawn a nih chuan Robin Van Persie leh ka teammate Claudio Pizarro te hi ka ngaisang em em bawk a ni," tiin a sawi.