Kum 51-ah boxer Hopkins chawl dawn

Boxing khawvela kum 28 chhung cheng tawh Bernard Hopkins chuan December 17 khian Los Angeles Fo-rum-ah Joe Smith chu ring chhungah a hmachhawn dawn - nakkum Janury khian kum 52 a ni tawh dawn!

Middleweight leh light-heavy-weight a title hrang hrang lo kawl tawh boxer chuan, "Mi tam zawk chuan ka kum chungchang leh boxing-a hun ka lo hman tawh dan ringawt an ngaihtuah ang. Kei erawh chuan Joe Smith ka knockout theih dan tur ringawt ka ngaihtuah thung a ni," tiin a tha a la za hle.

Hopkins hian kum 1988 khan professional huang chhunga a boxing match hmasa ber khelin Clinton Mitchell lakah a tlawm a, hetihlai hian December-a a hmachhawn tur Joe Smith hi a la piang lo!

'The Executioner' tia hminglem an pek Hopkins hian vawi 66 inhnek a hmachhawn tawhah vawi 55 hnehna a chang a, vawi 32 a khingpui knockout in vawi sarih a tlawm a, vawi hnih a inhnehtawkpui a ni.

Kum 1995 khan kum 30-a upa niin a world title hmasa ber a hlawh chhuak a, a middleweight kawnghren chu kum 20 chhung humhim theiin hetianga rei champion kawnghren hum thei hi boxer zingah an la awm ngai lo. A inhnek hnuhnung ber chu November 2014 khan a ni a, WBA, IBF leh WBO light-heavyweight title inchuhnaah Russian boxer Sergey Kovalev chu point hmangin a hneh lo.

December-a a hmachhawn tur Smith hi kum 27-a upa a ni a, kum 2009-a a professional match hmasa ber a khelh hnuah vawi 22 inhnek tawhin vawi khat chiah a la tlawm a, vawi 18 a khingpui a knock out thei.