Khawlailungin Dinthar an pet tla

LBS Suzuki 22nd Inter Branch YMA Football Tournament-ah Khawlailungin nimin khan Dinthar 2-0 in an hneh a, vawi hnih champion tawh Dinthar an match hmasa berah an tla nghal. Muallungthua inkhel hi a hmuhnawm a, a tawpah Khawlailung an vannei ta zawk.

Khawlailung tan Delhi FC tana khel K. Vanlalhriatzuala a che ṭha a, RC Zonunpuia'n minute 80-naah hmahruaina goal khungin injury time-ah Lalthantluanga'n chak nemnghehna goal a khung chauh. Player 10-a khel Dinthar an vanduai ta thung.

RG Stadium-ah Aizawl khaw pawn team ṭha pahnih an inkhel a, Kawnpui Venglaiin 3-2 in Tlungvel Vengthar an hneh hram. Inkhel dangah Chite Vengin Kelsih 6-0 in an sawp a, Hualngohmunin Zemabawk North hnehtu Mualpui, ITI 3-2 in an hneh.

Chite Playground-ah Zobawk Vengtharin record thar an siam a, Upper Republic 23-0 in an sawp. Zobawk tan Aizawl FC winger Sawma Tlangtein goal 11 ngawt a khung a, a nau Ruata Tlangtein goal li a khung bawk. Upper Republic hi naupang rual an ni a, kum 14 hnuai lam inelna Naupang League-a khel an awm nual a, tun inelna tihlawhtlingtute zinga mi an ni.

1st Bn MAP Ground, Armed Vengah College Vengin inkhel hmuhnawm takah Mission Vengthlang 2-0 in an hneh a, College Veng hi MPL club pawh lo enkawl tawh Sabito Remlalthlamuanpuia enkawl an ni. Inkhel hnuhnung berah vawi thum champion tawh Electric Vengin 11-0 in Muanna Veng an sawp a, Lalhlimpuia (Tata) leh Lalbiakhlua (Biaktea) ten hattrick an siam ve ve.