Vawiinah Mizoram Vs Maharashtra

Swami Vivekananda Men’s U20 National Football Championship-ah tukin zing dar 7:30 hian Mizoram leh Maharashtra te an inkhel dawn. Inkhelhna hmun hi RKM Ashrama Ground, Chhattisgarh a ni a, Lalrindika Hmar kaihhruai Mizoram hi an vawi khat khelhna tur a ni.

Mizoram hi group D-ah Maharashtra, Tripura, Jharkand leh Himachal Pradesh te nen an awm ho a; May 12, Thawhṭanni khan Maharashtra-in Himachal Pradesh 2-0 in an hneh a, Tripura-in Jharkhand 1-0 in an hneh bawk.

Mizoram coach Rindika Hmar chuan, "Zing lam dar 2:00-ah kan thleng chauh a, zing (nimin) lam kan training hunah kan training thei lo. Kan khelh turte hi match khat lo chak tawh, an phur lai tak a ni dawn bawk a. Tin, Maharashtra hi kan group-a hautak ber tura kan lo ngaih a ni a, hahdamna hun kan nei ṭha tawk lo hi kan tawrh loh hram ka beisei.

"A tawp lama midang results a innghah hahthlakzia kan hre vek a, point kan hmuh ngei a ngai a, kan theihtawp kan chhuah a nga, fimkhur tak siin attacking football kan khel ang, result ṭha tak kan nei turah ka ngai. Min ṭawngṭaipui turin Mizo mipui kan insawm e," tiin Vanglaini a hrilh.

Kumina neih National Games-ah khan coaching staff-ah Rindika hi a awm a, a tawpah inkhel dang result nghakin a vanduai zawkah an ṭang tawh - midang result-a innghah hrehawmzia hrechiangtu a ni. Tun ṭumah hian group pariatah ṭhendarh an ni a, group khat aṭangin team khat chauhin quarterfinal an lut ang.