Team ṭha BVT inlan hun

LBS Suzuki 22nd Inter Branch YMA Football Tournament-ah vawiin hian champion rinkai zinga mi Bethlehem Vengthlang an inlan dawn a, RG Stadium-ah tlai 2:30 hian Falkawn an hmachhawn ang. BVT hi MPL leh All India Police Meet-a Mizoram Police champion pui tawhtu Lalbiaksanga Colney-in a enkawl.

BVT hian ISL-ah pawh hmun pawimawh chang pha K. Lalṭhathanga (Puitea) leh PC Laldinpuia te an nei a, I League club Delhi FC tana khel keeper Lalmuansanga leh defender K. Lalmalsawma (Buanga) te an awm a, an tawh a khirh dawn. Chutihrualin BVT-in striker ṭha an nei bik lo.

An khingpui tur Falkawn hi B. Zoramthara enkawl an ni a, anni hian Muallungthuah Lengpui Model Veng an hneh tawh. Falkawn hi team nem zawk tura ngaih an ni a, mah se BVT barakhaih ve thei an ni thung.

Muallungthu lamah Lalengmawia Ralte (Apuia) te veng Vaivakawn leh West Serzawl te an inkhel dawn a, India aiawha khel tur Apuia hi squad-ah ziahluh a ni lo thung. Tlai dar 2:30-ah Aizawl inkhelh thiam Bawngkawn an inlan dawn a, Kawnpui Bangla Veng an hmachhawn ang.

1st Bn MAP Ground, Armed Vengah team ṭha inlan tur an awm. Kolasib Ṭumpuiin chhun dar 12:15-ah Khawhai an hmachhawn dawn a, Ṭumpui hi Kolasib-ah pawh field nei leh inkhelh thiam veng an ni.

Player neih ṭhat avanga champion rinkai ni pha Durtlang an inlan dawn bawk a, tlai dar 2:30-ah Mamit Hmar Veng an hmachhawn ang. Durtlang hian hming langsar Lalchungnunga, Hmingthanmawia (Valpuia), Ricky Lallawmawma, Lalfelkima leh Isak Vanmalsawma te an nei a, an buk a rit hle.

Chite Veng Playground-ah New Serchhip Chhekhnaiin Meidum an hmachhawn dawn. Chhekhnai hi I League-a Indian top scorer Lalrinzuala leh kum zawna First Division top scorer Lalthuthlunga te awmna a ni a, goal hmuh tur a awm ang. Inelna hnunung ber finalist Tlangnuam leh Sesawng an inkhel dawn. Champion lai Venghnuai an tlak vangin Tlangnuam hi team nem tura ngaih ngawt chi a ni lo, Sesawng aiin an ṭha zawk.