Arnold chhuakin champion lawm a nghawng dawn lo - VVD

Liverpool captain Virgil van Dijk chuan Premier League champion an nihna chu, an fullback chhuak tur Trent Alexander-Arnold-a boruakin a nghawng a rin loh thu a sawi chhuak.

Kum 26 mi Trent hi hun rei tak Real Madrid nen sawizawm an ni a, contract thar a ziah loh reng hnuah, kar hmasa lawk khan June thla tawp lama Liverpool a chhuahsan tur thu a sawi - thu thar berah chuan Real hian June-a lakluh an duh tawh!

Arnold hian June 30 thleng Liverpool-ah contract a nei a, mahse, June 19-ah Real hian FIFA Club World Cup-a an match hmasa berah Al Hilal an hmachhawn dawn - Arnold hi Club World Cup-ah chhawr hman hram an duh.

Hetiang a nih avang hian Real chuan free transfer-a an lakluh tur Arnold-a manah hian Reds chu £850,000 pek a, a hlawh an la pek lohte pek tlaksak vek an inhuam bawk niin an sawi - June-ah Real a pan ngei hmel.

Arnold hian Liverpool a chhuahsan tur thu a puan hnua a vawi khat nan Pathianni zan khan Reds jersey nen match a khel a, Arsenal nen 2-2 a an inhnehtawkna inkhelah bench aṭanga luhtir niin, fan-ten an au el nasa hle.

Hetiang boruak avang hian Arnold hian Reds champion lawmna chu a hliahkhuh mai ang, tih hlauthawng pawl an awm a, VVD erawhin a hlauthawng ve lo. Dutch defender chuan, "Match hnih kan la hmabakah hian chak ve ve kan duh a, chumi zawhah chuan, kan vaiin, Trent pawh tiamin, champion nomawi chawi ho kan duh a ni.

"Trent-a boruak hian kan champion lawmna boruak a hliahkhuh ka ring lo a, kan player-te hian hun hlimawm tak hman an phu a ni," a ti a, player pakhat chhuak tur vanga fan-te chu champion lawmna boruak tichhe lo turin a duh.

Hetihrual hian VVD chuan fan-te lam chhan zuiin, "Fan-te lungawi lohna hi chu football-in a ken tel a ni a, a pawm thiam ve a ngai a ni mai a, team pawhin kan pawm thiam a ngai. Zep lohah chuan khatiang thil kha a thlen ka ring lem lo a, ani chuan a lo ring lawk mahna. A awlsam lo, mahse, a tan kan awm reng e.

"Season thara kan khel ho tawh lo turte hi hrehawm kan ti a, player ṭha tak, quality sang tak a nihzia hi kum sarih chhung kan hmu tawh a, a uiawm dawn a ni," a ti.

Liverpool academy graduate Arnold a chhuah dawn lai hian VVD leh Mohamed Salah te erawhin Reds tan contract thar an ziak a, kum hnih dang ve ve an la cham dawn. Mahse, Liverpool captain chuan Trent-a dinhmun leh an dinhmun chu khaikhin chi a nih loh thu a sawi.

Kum 33 mi VVD chuan, "Mi tin hian mahni ngaihdan kan nei vek a, Trent pawhin club tana a tih theih chu ti vek tawhah a inngai a ni mai. A inngaih ang hian a tireng bawk a, chuvangin chona thar hmachhawn a duh a ni. Media aṭanga ka lo hmuh danin, khawvela club lian ber pawl Real Madrid zawm tur a ni a, ka hrethiam," a ti.

Dutch defender chuan sawi zawmin, "Keipawh mahni buai buaiin ka lo buai ve a, ka hma hun chinfel ve tho ka ngaih avangin chu lamah chuan ka rilru ka pe mah zawk. Min sawmtu club tam tak an awm a, mahse, kei chuan Liverpool hi ka awmna tur takah ka ngai a ni," a ti a, Anfield lo hmun dangin a lung a len lo.