Man United-in sa an hem dawn

Manchester United-in Europa League nomawi an chawi chuan an club training ground Carrington-ah sa an hem dawn. Ruben Amorim-a hote hian anmahni ang bawka Premier League-a che chhia Tottenham Hotspur nen May 21, Nilaini zan dar 12:30 khian San Mamés, Bilbao-ah final an khel ang.

Mahse, Man United hian Europa League nomawi hi chawi ta reng pawh ni se Manchester kawtthlerah kawng an zawhpui dawn lo. Hei chauh hi a ni lo, final khelh hun atan hian player-te pawhin a thlawnin ticket pahnih chauh an dawng dawn.

Sir Alex Ferguson-a awm loh hnuah Man United-in khelmualah result an nei ṭha lo a, an sum dinhmun a ṭhat loh avangin inrenchenna an kalpui nasa. Tun ṭuma player pakhatin ticket pahnih chauh an dawng tur pawh hi, chung zinga mi chu a ni. Club hnathawkte pawhin chawchhun man a thlawna an ei ṭhin chu a man an pe tawh bawk.

Chutihrualin United hian player-te hnenah ticket 10 an lei theih thu an hriattir a, an ṭhiante leh chhungte kal leh hawna hi an buaipui vek a ngai dawn bawk. English club hian an hnathawktute tan ticket a thlawna an sem loh tur thu an puang tawh bawk.