Sheffield United-in Premeir League an hnaih

Championship aṭanga Premier League khel tur zawnnaah Sheffield United-in final an lut a, Blades hian semifinal-ah Bristol City an sawp.

Chris Wilder-a hote hian first leg-ah Bristol City hi 3-0 in an hneh tawh a, Thawhṭanni zan khan an mualah 3-0 bawkin an hneh nawn. Blades tan hian Kieffer Moore, Gustavo Hamer leh Callum O'Hare ten goal khat ṭheuh an khung a, aggregate-ah 6-0 in an chak.

Playoff semifinal pakhat zawkah Sunderland leh Coventry te an inhmachhawn a, first leg-ah Black Cats 2-1 in an chak. Nizan khan second leg khelh niin result kan hre hman lo.

Blades hi 2023-24 season khan Premier League aṭangin an relegate a, kuminah erawh point 90 hmuin pathumnaah an awm - playoff hmanga Premier League khel tura rinkai ber an ni. Championship aṭangin champion Leeds United leh pahnihna Burnley te chu Premier League khel turin an tling tawh.