Boston Celtics dinhmun a duhawm lo

Champuioan lai an ni a, team ṭha leh hmuhnawm ni bawk mah se Boston Celtics chu NBA Eastern Conference final lut loa tla mai thei dinhmunah an ding mek, vawi khat an chesual leh zeuh a nih chuan inelna an mangṭha a ngai tawh ang.

Nimin zing Eastern Conference semifinal game 4 inkhelah Celtics hian New York Knicks chu 121-113 in an ngam lo. Best of seven series khelh turah Knicks hian 3-1 in hma an hruai ta a ni.

Quarter thumna an khelh lai chuan Knicks hi point 14 ngawtin an hniam zawk, mahse beidawng duh lo leh huaisen taka bei letin a tawpah an chak - May 15, Ningani zing dar 4:30-ah game 5 an khel leh ang.

Conference finals lut turin Knicks tan vawi khat chak a tawk a, an khingpui Celtics tan erawh an match khelh hmabak la awm theiah chak vek a ngai tawh thung, chetsual zeuh pawh a remchang tawh lo tihna a ni.

Point 42 neitu Jayson Tatum a thlak chungchang sawiin Celtics coach Joe Mazzulla chuan, "A hnungzâng hnuai lam a hliam. MRI tih a ni ang a, chumi hnuah a dinhmun dik tak kan hre thei ang.

"Theih ni se la chuan khel tluan se la kan duh, mahse hriselna kan ngaihpawimawh hmasak zawk a ngai," tiin a player chungchang a sawi. Tatum hi quarter hnuhnung ber an khelh laiin a hliam vang hian thlak a ni.

Knicks an chak theih nana thawh hlawk tak, point 39 ngawt neitu Jalen Brunson chuan, "Kan rilru puthmang hi a pawimawh ṭhin, hun a tawp hma chuan kan beidawng tur a ni lo.

"Tun ṭumah pawh khan chak lo thei dinhmunah kan ding reng a, mi tam tak chu ni se an beidawng tawh ngei ang. Mahse, kei leh ka ṭhiante hian hlauh nei loin inelna kan hmachhawn a, rah ṭha a chhuah ta a ni," tiin a sawi.

Western Conference lamah pawh Golden State Warriors chu tla mai thei dinhmunah an ding mek. Nimin zing khan Minnesota Timberwolves chuan 3-1 a hma an hruaina ni turin Golden State hi 117-110 in an hneh.

Warriors hian hliam vangin Stephen Curry an la chhawr thei lo, an thiampuipa tel lo chuan result ṭha neih an harsat. Quarter thumna an khelh lai phei chuan Timberwolves hian a zawnin point 17 ngawt neih tluan lai te an nei hial.

Minnesota coach Chris Finch chuan, "Chak lo zawk thawh chhuah leh tum ang maiin kan khel a, a tir aṭanga a tawp thleng khan hnehna chan chakin kan tuihal huam huam reng a ni ber mai," tiin a sawi.

May 15, Ningani zing dar 7:00-ah game 5 an khel leh dawn. Golden State Warriors hi an chak lo leh a nih chuan inelna an mangṭha a ngai dawn a, an tan tlawm a thiang tawh lo tihna a ni.