UCL khel tur Atalanta

Atalanta chuan season tharah Champions League an khel dawn tih a chiang ta. Thawhṭan zan khan Atalanta hian AS Roma chu 2-1 in an hneh a, point 71 hmuin Serie A table-ah pathumna aia hniam an ni thei tawh lo.

Mualneitu Atalanta tana Ademola Lookman-a goal khung chu Bryan Cristante-a'n sut mah se, hun tawp dawn lamah Ibrahim Sulemana chuan an chakna goal a khung a, an mamawh zat point an hmuh theih phah.

Italian football inelna sang berah season tawp hmain match khelh tur pahnih ṭheuh an la nei, hmahruaitu Napoli leh Inter Milan te umphak thei tawh lo mah se Atalanta hi an hnuaia mi ten an lehpel thei tawh bik lo a ni.

Serie A aṭangin team pali ten Champions League an khel dawn. Juventus, Lazio, AS Roma, Bologna leh AC Milan ten hmun ruak pakhat an la inchuh dawn a, season tawp inum boruak a la ngaihnawm dawn hle.

Inkhel dangah Venezia chuan Fiorentina 2-1 in an hneh ve bawk. Venezia hi tlak hlau zinga mi an ni a, point thum hlu tak an hmuh belh tak avang hian tla thei china awm Lecce aiin point hatin an sang mek, an himna erawh a derthawng rih hle thung a ni.