Bayern-ah Neuer a nghet lo?
Germany captain Manuel Neuer chu a khelh mekna Bayern Munich nen contract chungchangah an la inrem thei lo a, amah lo ngaihventu Chelsea leh Manchester City ten beisei an nei ve mek.
Kum 34 mi Neuer hian German champion tan hian nakkum June thla thleng daih bak contract a nei tawh lo. German rama sports chanchinbu pakhat Kicker-in a tarlan dan chuan Neuer hi a thil phut mipui hriata a darh avangin club lakah a lawm lo.
German chanchinbu lian Bild pawhin Neuer-a agent Thomas Kroth chuan a player hlawh atan hian season khatah pound maktaduai 17 a phut niin a tarlang a, inbiakna chu nei ngei mah se an duh leh tum angin thil a kaltluang rih lo a ni.
Bild tarlan dan chuan Bayern lamin kum 2023 thleng daih contract an zawrh a, chutih hunah chuan goalkeeper hi kum 37 mi a ni tawh dawn - kum khat pawhsei theih tur a ni bawk ang.
Mahse, Neuer-a'n hlawh tam zawk a duh bakah kum 2025 thleng daih contract a duh ve thung. Bayern hian match 373 khelh aṭanga clean sheet vawi 191 nei thei hi chelh an duh a nih chuan thlem lungawi dan an zawn a ngaih hmel.
Coronavirus vangin Bundesliga hi an chawl lailawk mek a, training erawh an nei ṭan leh tawh. Bayern hian tun hnaiah coach Hansi Flick leh forward Thomas Mueller te chu kum 2023 thleng daih contract an lo ziahpui tawh a ni.