Tour de France sawn a ngai dawn
Thirsakawr hmanga intlansiakna lian leh ngaihhlut ber Tour de France chu kumin hian a hun pangngaiah neih theih a ni dawn lo. Covid-19 vangin French sorkar chuan July thla laihawl thleng punkhawmna lam chi a khap a ni.
Ruahman lawk dan chuan June 27 aṭanga July 19 chhung hian Tour de France hi neih tur a ni. Mahse, France president Emmanuel Macron chuan hri leng laka an him theih nan inkharkhipna a pawtsei a, inelna neih theih a ni rih lo.
Season hmasa khan Colombian tlangval, Team Ineos rider Egan Bernal chuan hnehna a chang. Kuminah hian Vawi li champion tawh Chris Froome a inlan dawn a, nikum lama Bernal-a elpui Britain tlangval Geraint Thomas pawh a tel ang.
Tour de France 2018 champion Thomas chuan, "Hun rei tak aṭanga kan lo beisei leh tum ve tawh a tih theih dawn loh hi chuan rilru a na duh a, awm dan pangngaia awm hi a har ṭhin. Mahse mipui vantlang ṭhat tlanna tur zawk a nih chuan kan tuar mai tur a ni.
"Inelna hi ṭhulh a ni hran lo a, nipui laiin kan neih theih hram chu ka beisei. Khua a lum zual a nih erawh chuan inelna a hautak sawt dawn tihna a ni," tiin a sawi.