IPL khelh hun sawn a ngai
Cricket inelna zinga sum tama Indian Premier League 2020 chu a khelh hun tura an ruahman chu a vawi hnih nan sawn hlat a ngai dawn. India ram chhungah May 3 thleng inkharkhipna kaltlang pui tur a nih avangin IPL khelh theih a ni rih lo.
Twenty20 inelna hi a tirah chuan March 29 khan khelh tura tih a ni. Amaherawhchu, Covid-19 vangin a hun hi sawn a ngai a, ruahman dan chuan April 15, Nilaini khan khelh theih beisei a ni.
Mahse, Thawhlehni khan prime minister Narendra Modi chuan coronavirus darh zel tur ven nan May 3 thleng ram pumah inkharkhipna kaltlang pui tur a nih thu a sawi a, cricket inelna lian hi a vawi hnih nan khelh hun sawn a ngai.
India rama cricket thuneitu sang ber Board of Control for Cricket in India (BCCI) chuan IPL khelh hun tur hi an la sawi chiang leh lo. BCCI president Sourav Ganguly chuan tunlai boruak an zirchian reng thu a lo sawi tawh.
Inelna sawn chungchangah Vanglaini chuan IPL Governing Council member pali zinga mi Mamon Majumdar a be pawp. Mamon chuan, "Central sorkar thu chhuak kha kan ngaichang reng a, tunah chuan a hunah kan khel thei dawn lo tih a chiang.
"September thla velah kan khelh daih pawh a ngai mai thei. T20 World Cup leh Asia Cup a awm bawk avangin hun a chep tawh dawn a. inelna pawh hi match tih tlem emaw, group hrana ṭhen hrangin emaw a khelh rei loh dan ngaihtuah a ngai ang," tiin Vanglaini a hrilh.
IPL Governing Council hi Indian Premier League thuneitu an ni a, member pali bakah BCCI secretary leh treasurer an tel bawk. Member pali zingah hian Cricket Association of Mizoram honorary secretary Mamon Majumdar a tel ve a ni.