Serie A player endik an tum
Italian Football Federation chuan Serie A khelh chhunzawm theih an la inring reng a, club tin player-te chu May thlatir hian Covid-19 an kai em tih endik vek theih an inbeisei.
March 9 aṭang khan Serie A hi coronavirus vangin tiamchin awm loa tihtawp lailawk vek a ni a, league match khelh hmabak 12 an la nei. Inkhelh hun sawn vangin 12 aia tam khelh tur nei pawh an la awm.
IFF president Gabriele Gravina chuan, "Hun ralmuang leh ṭha kan thlen hunah inelna chu kan nei zo ang. Kan inhmukhawm leh thuai dawn a, kan beisei dan chuan May thla tir aṭang hian player endik kan tum.
"Nipui lai thleng inelna hi awm thut thei a ni, a tawp hun atan ruahmanna kan nei rih lo, inelna neih zawh ngei erawh kan tum," tiin season kal laklawh lai chu khelh zawh ngei an tum ruh rih hle.
Italy hi khawvel ram hrang hrang zinga hri kai tamna leh thi an tamna hmun a ni a, football player ṭhenkhat pawhin hri leng hi an kai. Match hnuhnung ber an khelh thleng khan Juventus chuan hma an hruai, an hnuaiah Lazio leh Inter Milan an awm.
Serie A team hian training an la nei chiah lo, kar hmasa aṭang khan Bundesliga lamah erawh training hi an kalpui tawh. German club ho hi European club zinga hri len hnua training nei leh hmasa ber an ni.