Engtin nge Premier League a kal zel dawn? Murphy, Sutton leh Gullit te thlirna

Football expert ṭhenkhatin thil thlen theih dana an ngaihdan an sawi chhuak a, tun ṭumah hian Danny Murphy, Chris Sutton leh Ruud Gullit, Pat Nevin te thlirna phochhuah a ni.

Tu nge Murphy : Kum 43 mi Danny Murphy hian Liverpool-ah hming a chher a, Premier League club dang Charlton Athletic, Tottenham Hotspur leh Fulham tan te khelin Championship club Blackburn Rovers-ah player anga a hun tawp a hmang. Murphy hian Liverpool hi FA Cup (2000–01),  Football League Cup (2000–01, 2002–03), FA Community Shield (2001),  UEFA Cup (2000–01) leh  UEFA Super Cup (2001) ah te champion puiin 2002-03 season khan Liverpool Player of the Season-ah thlan a ni. 

Murphy thlirna : Mipui hriselna hi thil dang zawng zawng aia pawimawh a ni a, chutihrualin football khelh hun pawh a awm leh ang.  A him a nih phawt chuan entu awm loin khel se, TV lamah an pe chhuak a nih bawk chuan a ṭha zawngin mipuiah nghawng lian tak a awm thei ang. Mipui hian thlir tur an mamawh a, hlimna an mamawh. Mipui maktaduai nga dawnin Virtual Grand National an thlir a nih chuan Premier League entu chu an va tam dawn em!

(April 4 khan sakawr intlansiakna Virtual Grand National buatsaih a ni a, hetah hian Potters Corner (sakawr) chu pakhatna niin online hmanga en theih a ni a, entu tam lai berin mi maktaduai 4.8 velin an en. Virtual Grand National buatsaihtute hi sakawr intlansiak lam hrechiang an ni a, a tak ang maia angin sakawr intlansiak hi an buatsaih a ni)

Tu nge Sutton: Chris Sutton hian 1995 khan Premier League-ah Blackburn Rovers a champion pui a, kum 1994-a Norwich aṭanga Blackburn a zawm khan pound maktaduai nga man niin English football-a player manto ber a ni. Kum 47 mi Sutton hi Chelsea, Celtic, Birmingham City, Aston Villa leh Wroxham tan a khel tawh bawk. 

Sutton-a thlirna : Mi tumahin eng chen nge 'lockdown' a ngaih dawn an hriat loh avangin kan inrinsiak a ni ber. League Managers' Association chief exeuctive Richard Bevan chuan, "An inkhel dawn a nih chuan player-te hi coronavirus lakah an fihlim em tih endik phawt a ngai," tiin a sawi a, a dik hle. Amaherawhchu NHS worker leh damlo te endik hmasak phawt a ngai tih hriat a ṭha.

Premier League hi entu kal loin kal thei pawh ni se match zawng zawngah doctor leh ambulance an awm a ngai tih hriat a ṭha. Tuna a lan dan mai hi chuan tun aṭanga thla hnihah pawh coronavirus vanga thihna hi a reh dawnin a lang lo a, chutihrualin an tlem thei tawh thung. Chuti chung chung chuan football vanga medical lam mite pawh pen kha a dik thei ang em?

Covid-19 buaina hian ziaawm lam a pan nih pawhin medical lam mite hian hahdam an mamawh dawn. Chutihrualin football lama pawisa tam vangin an rawn let thuai thei bawk. Kei chuan nghah rih phawt a ṭhain ka hria. Sumdawnna lam buaipuitute chuan sumdawnna ṭan leh tawh an duh ang. Chutiang chiah chuan Premier League khel tura duhtu an tam a, amaherawhchu mihring nunna aiin football hi kan dah hmasa thiang lo a, football pawh kan duat bik tur a ni lo.

Tu nge Gullit : Dutch trio zinga mi Ruud Gullit hi rual u zawkte tan chuan hriat loh chi a ni lo a, Marco van Basten leh Frank Rijkaard te nen inkawpin 1988 khan European Championship-ah Netherlands an champion pui a, kum 1987 khan world record transfer fee-in Milan-in PSV aṭangin an lalut. Kum 1987 hian Ballon d'Or a dawng a, World Soccer Player of the Year-ah 1987 leh 1989 te khan thlan a ni a, kum 57 mi a ni tawh

.Gullit-a thlirna : Football hi mihring nunna nena khaikhin tur khawpin a hlu tawk lo a, hnathawh theih loh vanga buai leh harsatna dang neite ai pawhin a pawimawh lo zawk. Tunah chuan kan vai him tlanna hi a pawimawh a, hetiang zela a kal chuan football pawhin harsatna lian zawk a tawk dawn. Mi tam takin Premier League hi pawisa lamah an duham mah mahah an ngai a, amaherawhchu tumahin club hi tlachhia se an ti lo. Hei vang tan hian kal zel dan tur hi an ngaihtuah reng a ni.