Tottenham-in an thutlukna an sut
Premier League club Tottenham Hotspur chuan 'furlough scheme' an hman tur thu lo sawi tawh mah se an thutlukna hi an sut a, an hnuaia hnathawk ṭhenkhat hlawh 20% an tihhniam tur pawh sut leh a ni.
March 31 khan Spurs hian non-playing staff-te hlawh 20% a tihhniam a nih tur thu hi an puang a, hemi rual hian hnathawk 550 zinga 40% te chuan furlough scheme hmangin 80% hlawh chu sorkar aṭanga an lak tur thu an sawi.
Spurs thutlukna hmasa ang chuan hnathawk engemaw zat chuan April leh May chhung hi sorkar behchhan chungin hlawh an la dawn tihna a ni.
Mahse, London club thutlukna hi nasa taka sawisel a ni a, tunah chuan an thutlukna hmasa hi sutin club board member-te chauh an hlawh tihhniam a ni dawn. April leh May atana hlawh tihniam tura an sawi staff-te hian 100% in he thla hnih chhung hi hlawh an la leh phawt dawn a ni.
Kar hmasa Zirtawpnia an club thutlukna sut tura lo ngen tawhtu Tottenham Hotspur Supporters' Club (THST) chuan club thutlukna siam thar chu an thlawp thu an sawi a, lawmthu an sawi bawk.
Spurs thutlukna hmasaah hian player-te pawh an lawm lo nia sawi a ni a, London club-in thutlukna an sut chhan lian tak zingah player-te hi an tel. Khawthlang media ṭhenkhat tarlan danin Spurs hian player-te nen hlawh tih hniam chungchang inbiakna an kalpui mek bawk a, furlough scheme an hman tawh an sut leh tak avangin player-te nena inbiakna pawh tluang zawka kal tura ngaih a ni.