Pogba vs Souness: An boruak a 'hot'
Manchester United midfielder Paul Pogba chuan tun hnai khan television hmaa amah sawisel ṭhintu, Liverpool legend Graeme Souness a chhanglet a, "Tu nge a nih ka hre lo," a ti!
Kum 66 mi Souness hi inkhelh a chawlhsan hnuah football punditry lamah a inhmang a, Pogba hi langsar takin a sawisel ṭhin. Sky Sports pundit hian tun hnai khan Sunday Times-ah zawhna leh chhanna hun a hmang a, Pogba chungchang a chhan danah French midfielder tan lawmna tur a vang hle.
Souness chuan, "Pogba hian player ṭha tak ni turin theihna a nei a, infiammi pian dik tak leh thiamna sang tak a nei. Mahse, he game-a a rilru puthmang hi kei nen chuan a danglam hlak a ni.
"Ngaihtuahna pakhat chiah nei chungin a pen chhuak ṭhin a, chu chu, 'Player fing tak ka nihzia ka pholang ang a, naktukah chuan star ropui tak ka ni mai ang,' tih hi a ni. Player hmachhawn nuam tak a nih ka ring," tiin Pogba chu team aia mahni indah pawimawhah a puh.
Mahse, Pogba a ngawi mai mai lo. France international chuan, "Dik taka sawi chuan tu nge a nih pawh ka hre lo. Player ropui tak a ni tih an sawi chu ka hria a, a hmel pawh ka hria. Mahse, a hming ka hre lo.
"Punditry hi ka en ngai vak lo a, football hi ka en tawp a ni mai. Inkhelh zawhah eng nge an sawi tih lam ka ngaihtuah lo a, football-ah chauh rilru pek ka duh," a ti a, Souness a hriat ngai loh thu a sawi.
Souness-a'n hei hi a pai dam thei lo - Jamie Carragher nena Sky Sports programme 'The Football Show'-a an inkawmnaah Scottish midfielder chuan, "Football ṭawngkam pakhat ka rilruah a lo awm a, 'I medal dawnte chu dawhkanah rawn chhawp chhuak ta che,' tih hi," a ti a, "Kei chuan dawhkan lian tak ka inchhawp a ni," a ti zui!
Liverpool, Blackburn Rovers leh Newcastle United pawh lo enkawl tawh Souness hian a vanglaiin Liverpool tan league nomawi pangnga a chawi a, European Cup leh League Cup-ah vawi thum ve ve a champion bawk.
Souness hian Middlesbrough chu Football League Second Division-ah a champion pui bawk a, Coppa Italia (1), Scottish Primier Division (1) leh Scottish League Cup (1) nomawi a kawl tel cheu.
Manager hna a thawh chhungin Rangers tan league nomawi pathum leh League Cup pali a chawi a, Liverpool tan FA Cup-ah champion-in Galatasaray chu Turkish Cup leh Super Cup (1)-ah a champion pui a, Blackburn tan League cup nomawi a chawi bawk.
Pogba hian nomawi hlawhchhuah a nei ve nual tawh tho. Serie A nomawi vawi li a chawi a, Coppa Italia-ah vawi hnih a champion a, League Cup, Europa League leh World Cup-ah vawi khat ṭheuh a champion bawk - a nep bik lo.
Hriat tel tur erawh Souness hian career duhawm tak a hmang zo tawh a, Pogba erawh vanglai hun hmang chho mek a ni - French midfielder-in khelmual a mangṭha hunah khaikhin tak tak chu a theih chauh ang.