Newcastle-in neitu thar a nei hnai
Premier League club Newcastle United chuan neitu thar an nei hnai niin khawthlang media te chuan an tarlang a, Amanda Staveley kaihhruai sumdawng intelkhawm chuan Magpies hi pound maktaduai 300 vela lei an duh.
Companies House-ah (UK-a company ho inziah luhna) Magpies leh a leitu turte hian document an thehlut tawh a, Newcastle lei tuma inthurualte hi PCP Capital Partners, Saudi Public Investment Fund (PIF) leh Reuben Brothers-te an ni.
Khawthlang media-ten an tarlan dan chuan inbiakna hi a hlawhtling a nih chuan PCP Capital Partners neitu Amanda leh Reuben Brothers-te hian 10% ve ve share an nei ang a, Prince Mohammed bin Salman enkawl Saudi PIF hian 80% share an nei thung ang.
Magpies neitu Mike Ashley hi fan-te nen an inkar boruak a ṭhat loh avangin St. James' Park-ah a tla tlum lo a, October 2017 khan Newcastle hralh a duh thu hi a lo sawi tawh.
Ashley hian a tirah chuan club hi pound maktaduai 340 vel tala hralh theih a inbeisei a, mahse pound maktaduai 300 velah hian a lungawi a ṭul dawn niin a lang.
January khan Saudi PIF lam hian Magpies lei an tum thu hi a ri tawh a, Staveley hian 2018 khan lei a lo tum tawh bawk. Hetiang a nih avang hian fans tam tak chuan an club ṭan hian neitu thar a neih an la ring ngam lo - a tlawlh ngun tawh tlat!
BBC senior football reporter Ian Dennis chuan, "Tluang taka thil kal angin a lang a, mahse engtia rei nge indawrna hi a kal dawn tih chu zawhna a ni. Premier League-ah pawh lehkha thehluh tawh a ni a, mahse hetiang thil hi chuan thla khat tal hun a mamawh ṭhin.
"Fans zingah he thil hi a thlen ring lo an awm a nih pawhin dem theih an ni lo - hetiang hun hi an lo tawng fo tawh tlat a ni," tiin a sawi.