Gunners laipui kaptu Ozil

Mesut Ozil-a'n a vawi khat nan hattrick a siam. Nilanini zan Champions League inkhelah Arsenal chuan an mikhual Ludogorets Razgrad lakah goal an surtir - Alexis Sanchez, Theo Walcott, Alex Oxlade-Chamberlain leh Ozil-a goal hmangin Bulgarian champion hi 6-0 in an sawp.

Gunners hian inelna hrang hrangah a zawnin match sarih hnehna an chang ta a, an match hnuhnung 11-ah chak loh nei loin hengah te hian goal 23 zet an khung tawh.

Laipui a puak ring

Emirates Stadium-ah San-chez a langsar hmasa leh ber, minute 12-na lekah Chile international hian defender a bum hnuah mawi lutukin a chip lut; kum 27-a upa forward hian Arsenal tana a match hnuhnung parukah goal sarih a khung ta.

First half tawp hma hretin Walcott a rawn inlar a, Swansea laka goal hnih khungtu hian Ozil-a siamsak chu kawh zetin a hlap lut. England international Chamberlain chuan buai nuaih kar aṭangin an goal thumna a rawn khung - a bak zawng chu Ozil-a chan a ni.

Arsenal tlarhnung luahtu Laurent Koscielny-a'n mid-fielder Marcelinho ball chan lai a pet per sak a, ball per lo dawngtu Santi Cazorla chuan Ozil tan long ball a pet - German international hian tihsual leh bahlah nei miah loin minute 56-naah an goal lina a khung. Kum 28 tling hlim Ozil hian senior career-a a hattrick hmasa ber siam turin minute 83 leh 87-ah te goal a khung zui bawk.

Wenger a hlim

Sanchez-a'n goal hmahruai a khung aṭangin Arsene Wenger a ṭhu mai mai thei tawh lo, hamrik hnuhnung a rik thlengin French manager hi a hmelah a hlim tih a hriat a, a lungawi tih hairual a ni lo.

Wenger chuan, "A pawi-mawh hmasa chu last 16 luh a ni, Ludogorets khelmualah kan la kal ve leh dawn a, tun ang hian a awlsam tawh ngawt lo ang," tiin a ṭang fimkhur hle.

Arsenal hian a zawnin Cham-pions League group stage vawi 19 an khel thei a, tun hnai season ruk chhungin last 16 lut vek mah se quarterfinal an lut zo lo vek thung. Season ruk chhung hian group hmahruaitu an nih ngai loh avangin hmasawnna tur an ngah tih a chiang. Kuminah PSG nen a chung bera awm an inchuh chho dawn.

Eng nge an sawi?

Arsenal manager Wenger chuan, "Hnehna kan chang tluang a, kan chak apiangin inrintawkna kan neih belh zel bawk. He kan boruak ṭha tak hi kan chhawm nun zel pawh ka duh hle. Squad chhah tak kan nei a, tuna kan mamawh leh pawimawh chu ṭha taka khel chhuak zel thei tura inbuatsaihna ṭha neih chhunzawm a ni," a ti.

Ludogorets manager Geor-gi Dermendzhiev chuan, "Champions League kan vawi hnih khelhna chauh a ni a, kan tan chuan zirlai thar zel a la ni. Kan khingpui Arsenal kha kawng engkimah kan phak lo tih a chiang a, group hmahruaitu pawh an nih ngei ka ring - chutihrual erawh chuan ka naute pawhin theihna an nei tih chiang takin a lang ve bawk," tiin a sawi.

PSG chak chiang

Group A inkhel dangah Paris St-Germain chuan last 16 lut turin an dinhmun an sawhnghet chho ve zel bawk. Ligue 1 champion hian Angel Di Maria, Lucas Moura leh Edinson Cavani te goal hmangin Swiss club Basel an hneh. Unai Emery naute hian match thum khelh tawhah point sarih hmuin knockout round lut turin vawi khat chak bak an mamawh tawh lo.

PSG manager Emery chuan, "Basel khan min nawr na em em a, goal kan chhuah lo kha kan vannei. Last 16 lut turin kan dinhmun a ṭha tawh a, group hmahruaitu ni chung ngeia knock out round luh kan tum ang," tiin a sawi.