Bayern an tho leh ta

German champion Bayern Munich chuan match thum chhung hneh nei loa an kaltluan hnuah chak hmel an hmu ve ta - an mikhual Dutch champion PSV Eindhoven chu Champions League group stage inkhelah 4-1 zetin an sawp.

First half-ah Thomas Muller leh Joshua Kim-mich ten goal an khung hnuah Dutch club-in India chhulchhuak Luciano Narsingh hmangin goal khat an khung ve a, Bayern chhaih kawlhna goal mai a ni - second half-ah Robert Lewandowski leh Arjen Robben ten khung lehin match 14 chhung an khelmualah a zawnin hnehna an chang ta.

Champions League-a Atletico Madrid an ngam loh hnua league match hnih chhung a zawna an khingpui inhnehtawkpuitu Bayern manager Carlo Ancelotti chuan, "Inkhel bul kan ṭan ṭha a, chak duhna thinlung nen kan khelh avangin result duhawm tak kan hlawh chhuak a ni," a ti.

Group D inkhel dang-ah Atletico Madrid chuan Barcelona leh Leicester City hnungzuiin Champions League match thumah khelh tawhah an chak vek - La Liga hmahruaitu club hian Russian club Rostov chu 1-0 in an hneh a, he inkhela goal awmchhuan khungtu hi an league match hnu-hnung bera hattrick siamtu Yannick Carrasco a ni.

Atletico coach Diego Simeone chuan, "Game harsa tak kan khel a, Rostov khan an tlarhnungah player pariat vel an dah reng avangin paltlang an harsa a ni. Carrasco khan a khel ṭha takzet a, a khelh ṭhat hi a chhunzawm zel theih ka beisei," tiin Belgian winger chungchang a sawilang nghal.