Besiktas-in Napoli an barakhaih

Napoli-in Champions League match hmasa pahniha hnehna an chan hnuah Besiktas an ngam lo a, Turkish champion hian rinkai lo zawk nichungin khualmualah 3-2 in hnehna an chang.

Besiktas-in Adriano Correia leh Vincent Aboubakar goal hmanga vawi hnih zet hma an hruai hnuah mualneitu lamin Dries Mertens leh Manolo Gabbiadini penalty hmangin an si phurh an sut zel a, team pahnih an inngam tawk hle.

Mahse, hun tawp nan minute li chiah a awm tawh tihin Aboubakar bawk a inlar nawn leh a, Porto aṭanga loan-a Besiktas zawmtu striker hian a goal hnihna khungin Napoli tan sutna hun a awm tawh lo.

Napoli coach Maurizio Sarri chuan, "Keimahni tihsual vangin kan talbuai a, khel ṭha thawkhat viau mah ila tun ang inkhel pawimawha tihsual neih hi chu pawm dam theih a ni lo. Mahse, league match hnuhnung bera Roma kan ngam loh hnuah hma kan sawn leh tawh niin ka hria a, chu chu lawmna tur a ni," tiin chak lo mah se lawmna tur a hmuh tho thu a sawi.

Group B inkhel dangah Ben-fica chuan Dynamo Kiev lakah 2-0 in hnehna an chang bawk a, Portuguese club tan Eduardo Salvio chuan penalty aṭanga goal hmahruai a khung hnuah Franco Servi chuan goal hnihna a thawh ve leh a ni.