FIFA ranking India-in hma an sawn

FIFA ranking chhuak thar berah India-in hmun 11 zetin hma an sawn a, 137-naah an awm ve ta. September-a friendly match-a Puerto Rico hnehtu India hian point 25 hmuh belhin a vaiin point 230 an nei a, an chung chiaha awm Vietnam chu point khat chiaha phak loin an hnuaia awm Burundi aia an sanna pawh point khat tho a ni.

Asian Football Confederation aṭangin Iran chu a sang ber an ni a, 27-naah an awm. Asia aṭanga Iran hnaih bertu Australia chu 40-naah an awm pha ṭawk a, AFC hnuaia ram langsar zingah 44-na South Korea leh 51-na Japan te dinhmun chu inchhuanpui tham a la ni hran lo.

South Asian Football Confederation zingah India hi a sang ber an ni a, Blue Tiger (India sawina) hnaih bertu Afghanistan chu 145-na an ni. Bhutan (179), Nepal (186), Bangladesh (188), Pakistan (197) ten hmasawnna tur an la ngah tih hai rual a ni lo bawk.

FIFA ranking chhuak thar berah hian Argentina chuan match thum chhung a zawnin chak hmel hmu lo mah se pakhatna dinhmun an hauh zel a, Germany leh Brazil ten top three hmun ruak dang an luah khat bawk. Coach thar Julen Lopetegui hnuaia insiamṭha mek Spain-in top 10 aṭanga Wales nekchhuakin 10-na dinhmun an luah a, England-in an dinhmun ngai 12-na luahin Euro khel phak lo Netherlands pawhin hmun li a hma-sawnin 20-na an ni ta bawk.

Rank Team

1 Argentina

2 Germany

3 Brazil

4 Belgium

5 Colombia

6 Chile

7 France

8 Portugal

9 Uruguay

10 Spain

11 Wales

12 England

13 Italy

14 Switzerland

15 Poland

16 Croatia

17 Mexico

18 Costa Rica

19 Ecuador

20 Netherlands

*137 India