Tennis aia basketball thlangtu Kyrgios

Australian tennis star Nick Kyrgios chuan chanchin danglam a nei leh ta. Association of Tennis Professionals (ATP)-in chawlh kar riat chhung inkhel thei lo tura an hrem mek Kyrgios hian Rotterdam Open aiin NBA All-Star Celebrity Game khelh a thlang zawk!

World number 14 Kyrgios hi Shanghai Masters-a nungchang mawi lo vangin pawisa chawitir a ni tawh a, hrem a nihna hi tournament khelh kar chauha chhiar tur a nih avangin Janaury 15 thleng a awh ang. ATP World Tour 500 zinga pakhat Rotterdam Open hi February 8-14 chhunga khelh tur a ni a - a duh a nih chuan he inelnaah hian a inlan thei tawh dawn tihna a ni.

Mahse, kum 21-a upa Kyrgios hian rilru dang a pu daih. Mite hriat a hlawhna tennis tournament khelh nghal ai chuan February 12-a khelh tur 2016 NBA Celebrity All-Star Game a inlan a thlang zawk a ni.

NBA Celebrity All-Star Game-ah hian player 21 an inlan ṭhin a, NBA player chawl tawh, lemchan thiam, rimawi tumtu leh basketball ni lo infiamna dang huanga player ṭhenkhat an inlan ang. Team Canada leh Team USA a ṭhen hran tur niin Canadian rapper Drake leh Celebrity Game-a vawi li Most Valuable Player ni tawh Kevin Hart te chu coach an ni ang.

Rotterdam tournament director Richard Krajicek chuan, "Kyrgios hian a hnathawh aiin a chak zawng a dah lian zawk," tiin a sawi hial. Hei erawh hre tel ila, Kyrgios hian tennis a luhchilh hma hian Australia aiawhin basketball a lo khel phak tawh. Kum 1996 Wimbledon champion Krajicek hian Kyrgios aiah hian US Open champion Stan Wawrinka a inlan tur thu a sawi tel bawk.

Kyrgios chuan zawhna chhang-in, "Kum 14 ka nih lai aṭanga ka lo suangtuah tawh ṭhin kha a ni a, chuvangin NBA All-Star Celebrity Game-ah ka inlan ang. Ka ngaihdan chuan tennis chauh ni loin infiamna huang dangah pawh ṭha takin ka khel thei a ni," tiin a sawi.