Pep-a ngam loh Messi
Manchester City boss Pep Guardiola-a'n Barcelona a enkawl laia a hmanraw pawi-mawh-te kha an la chuai lo tih a hre nawn leh a, Spanish manager hi Nou Camp-ah 'Lionel Messi thiam zia' hmuh nawntir a ni.
Nilaini zanah Messi hattrick leh Neymar-a goal 'sial' hmangin Catalan club-in City 4-0 in an sawp a, Brazil captain hian penalty a hlah avangin Premier League hmahruaitu mualphona hi belhchhahin a awm lo.
Nou Camp-a inkhelah hian first half-ah goal khat chiah a lut a, City goalkeeper Claudio Bravo hnawhchhuah a nih hnuah goal thum dang a luh belh. Barca-in goal thuma hma an hruai lai hian substitute Jeremy Mathieu-a'n yellow card vawi hnihna hmuin Catalan club hi pakhatin an kim lo ve tho a, player 10 ve vea an inkhelh hnuah mualneituin goal lina an khung.
Aguero Out, Messi In
Manchester City-in Manuel Pellegrini an ban chhan chu Champions League nomawi an duh vang a ni a, Europe club lian el phak chu an tum ber an ni. Spanish manager Pep-a hnuaiah champion nghal an beisei lo a nih pawhin Catalan club laka goal li chhuah chu an duh lo ang.
Barcelona hmachhawn turin Pep-a'n thutlukna langsar a siam a, Everton laka penalty hlahtu Sergio Aguero chu bench-ah ṭhuttirin Kevin de Bruyne chuan 'false nine' hna a chelh a, Belgian midfielder hi Raheem Sterling, David Silva leh Nolito te'n an thlawp bawk.
Champions League inkhel pawimawha chhawr theih turin Lionel Messi a dam tawh a, Luis Enrique tih theih chu Ar-gentina captain hi inkhel bul ṭantir a ni. September 21-a Atletico Madrid nen 1-1 a an inhnehtawk hnuah Messi-a'n a vawi khat nan inkhel bul a ṭan.
Game Plan
Guardiola hoten Barcelona keeper Marc-André ter Stegen chu ball sem thei turin an siam lo a, Barcelona lamin Chilean keeper Claudio Bravo awmze neiin ball semtir an phal bik lo. Minute 15 chhung chu team pahnihin field lai an hmang
ṭangkai lo a, chungnung zawk an awm lo a tih theih.
Messi a ni tlat
City-in Messi an veng uluk tih phat rual a ni lo a, amaherawhchu awmze neia Barcelona-in field lai an hman ṭangkaina hmasa berah goal an khung. Minute 17-naah Messi ball pek chu box chhung aṭangin Andres Iniesta-a'n a khenglet zeuh a, City midfielder Fernandinho a tluk bawk avangin Argentina captain-in awlsam taka keeper Bravo bum nan hmangin goal hmahruai a khung.
Barca lakah City an zahpui-awm bik lo a, Ilkay Gundogan-a'n keeper Ter Stegen tan hna a siam sak bakah defender John Stones-a ball tauh chu goal sirah chiah a kal bawk. Catalan club-in Luis Suarez hmangin City keeper Bravo tan harsatna an siam ve tho a, first half-ah Jordi Alba leh Gerard Pique te inhliam vanga Lucas Digne (10') leh Jeremy Mathieu (38') te an luh bawk avangin English club hi tho chhuak leh thei dinhmunah an la ding.
Amaherawhchu City kee-per Bravo-a'n Suarez a pass avangin Uruguay forward-in goal khung theihna hun ṭha a nei a, minute 53-naah Chilean keeper hi box pawna ball a khawih avangin hnawhchhuah a ni. Player 10-a khel City lakah Messi-a'n zahngaihna a lantir lo a, De Bruyne-a pass sual hmang ṭangkaiin minute 61-naah Iniesta ball pass chu 'cool' takin a khung. Minute 69-naah City midfielder Gun-dogan-a pass sual chu Suarez-a'n box chhungah a vawrh lut a, awlsam takin Messi-a'n hattrick siam nan a hmang.
Minute 73-naah Pique thlak-tu Jeremy Mathieu chu Ra-heem Sterling tih tluk vangin hnawhchhuah ni mah se chak tur a chiang tawh a, Pep-a'n goal beiseiin Sergio Aguero a luhtir nachungin awmzia a nei tawh lo. Messi penalty hlawhchhuah Neymar-a'n goal-ah chantir thei lo mah se Brazil captain hian minute 89-naa Messi pass chu City defender ten uluk taka an venna karah harsatna nei lo ang hialin a khung.
Engtin zel?
Inkhel dangah Borussia Monchengladbach-in khual-mual-ah Lars Stindl leh Andre Hahn te goal hmangin Celtic an hneh a, hei vang hian Man-chester City chu Spain-ah mual-pho mah se Group C-ah pa-hnihna an la ni chhunzawm zel tho.
Barcelona erawh match thum-ah point kua an hmu tawh a, Messi telna team an danglam. Barca jersey no. 10 hian Champions League-a a match hnuhnung pariatah goal 10 a khung a, English club vawi 13 a hmachhawnah goal 15 a khung bawk.
Manchester City erawh Cham-pions League-a an chak loh chian ber ṭum a ni a, tun ṭum hi goal li an vawi khat chhuahna a ni. Guardiola hian Bayern Munich a enkawl laia Nou Camp a tlawh khan goal thum a chhuah tawh bawk a, Catalan club a chhuahsan hnua Barca vawi thum a hmachhawn tawhah goal kua a chhuah.
Chhuanlam nei Pep
Manchester City manager Pep Guardiola chuan, "Bar-celona anga team ṭha hma-chhawn hi chu a harsa a, chutihrualin player 10 kan nih hma kha chuan kan khing tawk a ni. Red card khan engkim a thlak danglam a, amahaherawhchu Celtic nena kan inkhelh zawh hnuah engmah hi a kaltluang lo. Everton nen kan lama kan tihluh bakah penalty vawi hnih kan hlah. Min hual veltu boruak duhawm lo lak aṭang hian kan talchhuah a ngai a ni," tiin an ṭhat theih dan ber an phochhuah loh thu a sawi.
An khelh dan sawizuiin Pep chuan, "Kan tum danin bul kan ṭan a, pressure kan pek ṭhat bakah ball possession kan nei a, goal khungna chance pawh kan nei. Amaherawhchu kan hun
ṭha kan hmang ṭangkai thei lo a, Barcelona laka chak tur chuan tihsual a thiang a lo," tiin goal li lai chhuah mah se chak thei an nih thu a sawi.
Spanish manager Guardiola chuan, "Kalphung kan thlak lo ang. Keeper aṭangin kan khel ṭan zel ang a, ka career tawp thlengin ka duh dan hi ka thlak lo ang. 4-0 in kan chak lo a ni thei a, amaherawhchu club thar mai kan ni a, kan la inhrechiang chho dawn chauh a ni," tiin a dinna ngaia a dinngheh thu a sawi.
City hian Celtic an draw hnuah Tottenham an hneh lo a, Everton nen an inhnehtawk hnuah Barcelona in an sawp. Season ṭantirha hneh theih loh ang maia Premier League-a hawi sang em em khan match li chhung chak hmel an hmu tawh lo a, Pathianni zan dar 6:00 hian tun hnaia che ṭha tak Southampton an mikhual ang.
GROUP C
Results, Fixtures, & Standings
September 13, Thawhlehni Zan
Barcelona 7 - 0 Celtic
Manchester City 4 - 0 Borussia M'gladbach
September 28, Nilaini Zan
Borussia M'gladbach 1 - 2 Barcelona
Celtic 3 - 3 Manchester City
October 19, Nilaini Zan
Celtic 0 - 2 Borussia M'gladbach
Barcelona 4 - 0 Manchester City
November 1 Thawhlehni Zan
Borussia M'gladbach 1:15 AM Celtic
Manchester City 1:15 AM Barcelona
November 23, Nilaini Zan
Celtic 1:15 AM Barcelona
Borussia M'gladbach 1:15 AM Manchester City