AFC Cup Champion lai hnehtu Bengaluru-in final an lut

Nilaini zan khan I League champion Bengaluru FC chuan Indian club ten an la tih theih ngai loh an ti a, an mikhual Johor Darul Ta'zim chu 3-1 a hnehin Indian football chanchina a vawi khat nan Asia ram club football inelna sang ber dawttu AFC Cup-ah final an lut - November 5 khian Iraqi club Al Quwa nen nomawi an inchuh ang.

Semifinal first leg-ah The Steelmen (Bengaluru sawina) hian away goal hlu tak nei turin Malaysian club hi 1-1 in an lo inhnehtawkpui tawh a, inkhel hmasa nena belhkhawmin Barcelona assistant coach hlui Albert Roca enkawl team hian 4-2 in hnehna an chang ta a ni.

The Steelmen an khawng

Sree Kanteerava Stadium, Bangalore-a inkhelah mikhual team-in goal an khung hmasa zawk a, minute 11-na lekah Safiq Rahim chuan Bengaluru keeper Amrinder Singh tih ṭhat tawk loh nangchingin goal a khung - Bengaluru chak hmel hmuh inbeisei mipui pungkhawm 21,379 te thawm a reh hle.

I League champion-in mahni muala awlsam taka tlawm an duh lo. Goal an chhuah hnuah vawi tam JDT tlarhnung an rum ṭhaih a, Malaysian goalkeeper Mohd Izham Tarmizi-a'n hnathawh tur a ngah malh malh hle. Minute 41-na a herchhuah meuh erawh chuan Malaysia international hian a dang seng tawh bik lo, Eugeneson Lyngdoh ke aṭanga chhuak corner chu Sunil Chhetri-a'n JDT defender hual karah ṭha zetin a tauh lut.

Striker class Sunil

Chawlhlawk hman a ni a, team pahnih dinhmun chu 2-2 niin khualmuala goal khung thei dinhmuna ding JDT chu final lut tura dinhmun ṭha zawk an la ni rih. Mahse, Bengaluru-in India captain Sunil Chhetri an kawl miau a, kum 32-a upa striker hian minute 67-naah yard 25 vela hla aṭangin goal ropui a khung a, striker class bik a nihzia a pholang nawn.

Mikhual team an che hleithei lo. Minute 75-naah Khasi tlang-val Eugeneson bawk a inlar a, a freekick pet ṭha tak chu Spanish defender Juanan-a'n an goal thumna ni turin a tauh lut. Champion lai JDT-in tih theih an nei tawh lo a, Indian football chanchin ziah danglamin a awm.

Manager thukhawchang

Bengaluru coach Albert Roca chuan, "Zan danglam bik a ni a, India hi cricket chauh khelhna ram a ni ta lo. Kan hlawhtlinna hi Bengaluru hnathawh chauh a ni lo a, India ram hmun hrang hranga kan fan-te hnathawh pawh a ni tel a ni. Minute hma-sa ber aṭangin fan-ten min
ṭawiawm a, a ropui takzet. Sunil Chhetri pawh ka lawmpui duh a, Bengaluru tan ani aia captain ṭha tur hi an awm chuang lo," tiin India international striker chu chhuang takin a fak.

Nilaini zan inkhelah Mizo player Malsawmzuala, Beikho-khei Beingaichho, Daniel Lalhlim-puia leh Lalthuammawia Ralte te chu bench lamah hun hman tluantir an ni a, Lengpui left back Lalchhuanmawia Fanai chu hliam vangin a inlan thei lo bawk.

Spanish coach chuan Chhuan-tea chungchang sawiin, "Ka player inhliam Lalchhuanmawia leh Udanta Singh te an dam hman ka beisei a, kar hnih lai final khel turin hun kan la nei a ni. AFC Cup nomawi kan chawi thei a nih chuan he club tan mai ni lo Indian football tan hmasawnna ropui tak a ni dawn a, player pahnihte hi an dam hman chuan champion chance kan nei sang lehzual ang," tiin a sawi.

Johor Darul Ta'zim coach Mario Gomez chuan, "Bengaluru hi AFC Cup champion turin an ṭha tawk. Player class sang tak tak an nei tih ka hria a, zanina an khelh dan ang khan an khel a nih chuan an champion thei ang. Season hmasa kan champion khan Malaysia football-in hma a sawn phah nasa em em a, chutiang chiah chu Indian football-ah pawh a thlen ka beisei a ni," tiin an khingpui team a fak.