Stamford Bridge mikhual tur Mourinho

Jose Mourinho-a'n a hmangaih hmasa Chelsea hmachhawn turin Pathianni zan dar 8:30 hian Stamford Bridge a tlawh dawn. Portuguese manager hian khawvel player manto ber Paul Pogba a hruai tel ang.

Pogba hian Europa League-a United-in Fenerbahce 4-1 a an sawp ṭumin goal hnih - penalty bakah goal ropui a khung. Juventus midfielder hlui hian phur belhchhahna turin club tenau deuh tum a la mamawh niin lang mah se club lian Chelsea lakah fiahin a awm nghal dawn.

Special tel loin Mourinho

Chelsea-in June, 2014 khan Champions League leh Portuguese League-a FC Porto champion puitu Jose Mourinho an lalut a, Portuguese manager hi 'The Special One' tiin media hmaah a inchhal nghal. Mourinho hian a ṭawngkam thlahdah ve tak chu um phain London club hi season zawnin Premier League-ah a champion pui a, Blues
ṭantuten nomawi chawi-puitu manager hi an ngaina hle.

Chelsea neitu Roman Abra-movich nen an inbakkaih deuh avangin Mourinho-a'n September 20, 2007 khan London club a chhuahsan. Portuguese manager hian Inter Milan kaihruaiin March 16, 2010 khan Stamford Bridge-ah a let a, Mourinho hian a club hlui hi Champions League Last 16 aṭangin pet chhuak mah se Blues ṭantuten an manager hlui an lawm. Hemi ṭum hian club PA System aṭangin Mourinho hming hi puanchhuah a ni a, Chelsea ṭantute ṭhutkhawmna aṭangin Mourinho au hla hriat tur a awm ṭeuh bawk.

Mourinho-a'n Inter Milan a treble champion pui hnuah Real Madrid a zawm a, Spanish club aṭanga a let lehna chu Chelsea tho a ni. Portuguese manager-in club thar a zawm apianga a tih ṭhin dan angin London club hi Premier League-ah a champion pui leh nghal a, season hnihnaah erawh league match 16-ah vawi kua a chak loh avangin a hna a chan. Hemi ṭum hian Mourinho chuan, "Club tan hian ka theihna zawng zawng ka hlan a, a chang chuan ka duh thawh lutuk te hian ka hre ṭhin. Amaherawhchu club dang ka enkawl pawhin hetiang tho hian ka theihna ka hlan ṭhin a, Chelsea erawh a danglamna chu ka chhuahsan hnuah ka rawn let leh a, he thutlukna ka siam chhan hi ka hmangaih vang a ni," tiin London club nen inzawmna thuk tak an neih hi a zep lo.

Chelsea supporter ṭhahnem takten Mourinho hi la ngaina mah se Blues-in Antonio Conte an neih tawh avangin kawng thar an zawh a ngai tawh.Pathianni zana Mourinho-a'n Stamford Bridge a tlawh hunah Portuguese manager hi duhsak bik a ni tawh dawn lo a, mikhual manager dangte an dawn sawn dan ang chauha lawm a ni tawh ang.

Attacking nge defending?

Jose Mourinho-a'n Anfield an tlawh ṭumin goal venhim chu hna berah a nei a, Europa League-a Fenerbahce an hneh ṭumin goal khung an uar thung. French midfielder Pogba-a'n Turkish club lakah goal hnih khung mah se Liverpool nena a khelh dan nen thlirin striker hnunga player ṭha ber a ni lo - Juan Mata a tluk lo. Juventus midfielder hlui hi tawlh hnuntir a nih erawh chuan Reds laka inkawp fuh Ander Herrera leh Marouane Fellaini te thawhdunna chu ṭhiah a ṭul ang.

Turkish club an hneh ṭum hian United tlarhmaah Wayne Rooney a rawn kir a, captain hian pressure a ngah ve tho nachungin Pogba chu penalty pet turin a kian a, United captain (goal 246) hian Sir Bobby Charlton-a club record tluk turin goal thum bak a mamawh tawh lo tih hriat tel chuan hruaitu a nih zia lang chiang lehzual. Rooney hi French midfielder goal ropui leh Jesse Lingard-a goal-ah a inrawlh tho.

United tlarhmaah Lingard bakah Anthony Martial a dam tawh a, Turkish club lamah goal an khung ve ve. Hetichung hian Mourinho erawhin Fenerbahce laka goal li an khung ṭuma a khelh dan aiin Liverpool an draw ṭum a khelh dan a thlan a rinawm zawk tho. United-in attacking football an phatsan ta a nih pawhin club ṭantute erawhin an ze ngai an la pu reng, Robin van Persie-a'n Fenerbahce tana Old Trafford-a goal a khung ṭumin entu mipui zawng zawng Sir Alex Fergusion tiamin kut bengin an lawm.

Hei le Costa

Chelsea-in Mourinho an ban chhanah khan player-ten an ma-nager an phatsan vanga ngaih a ni a, Diego Costa chu phatsantu zinga ngaih a ni. Amaherawhchu Antonio Conte hnuaiah Spain international striker-in goal khung hna a chhunzawm leh tawh a, Costa hian tun season league match riat-ah goal sarih a khung tawh.

Italian manager Antonio Conte-a'n Arsenal an hneh loh zawhah tlarhnungah defender pali hmang loin defender pathum a hmang a, hei hi captain John Terry inhliam hnua an tlarhnung a phui loh vangah a ngaih theih. Gary Cahill, David Luiz leh Cesar Azpilicueta te defence laia an din ho hnuah Chelsea-in goal an chhuah tawh lo.

Mourinho ang thoa defensive game khel thiam Conte-a'n goal khung thei Costa a nei a, Portuguese manager tan erawh Zlatan Ibrahimovic-a'n goal khung a harsat rih thung. Pathianni zanah club lian pahnih an intawng dawn a, coach lar pahnihin player langsar an ho ve ve dawn bawk avangin inkhel hmuhnawm a beisei theih ang.