Jerry-a mawi zanah Chennaiyin an chak

Chennaiyin FC chuan Indian Super League khelh mekah a vawi hnih nan chak hmel an hmu ve ta a, Ningani zan khan hmahruaitu NorthEast United chu Italian striker Davide Succi goal khat hmangin 1-0 in an hneh.

Mizo tlangval Jeje Lalpekhlua'n a vawi hnih nan khelhna hmun chang lo mah se Jerry Lalrinzuala erawh Vanglaini palai hnena a lo sawi tawh ang ngeiin inkhel bul ṭantir a ni a, Bethlehem rawlthar hian 'Swift moment of the match' chawimawina nen inkhel hun tawp a hmang.

India Under 16 & 17 captain hlui hian Katsumi Yusa-a'n Holicharan Narzary tana ball ṭha tak a siamsak chu a lo tibuai hman a, Chennai left back hi inrawlh hman lo se chuan NorthEast United hi goal khung turin an dinhmun a ṭha hle.

Chennaiyin FC coach Marco Materazzi chuan, "Siam Hanghal leh Jerry Lalrinzuala te khan an khel ṭha takzet a ni. Jerry inkhel hi hei aia tam zawk hmuh ka la duh a, hmun pawimawh a chang zel ang. Indian player naupang ṭha tak tak pawh kan kawl nual a, India national team tan an la inlan theih ka beisei a ni," tiin Mizo rawlthar Jerry-a chungah beiseina a nei sang hle.

Mimal Lawmman

Swift Moment of the Match Jerry Lalrinzuala, Chennayin FC

Emerging Player of the Match Siam Hanghal, Chennaiyin FC

Hero of the Match Bernard Mendy, Chennaiyin FC

Zanin Inkhel Tur

Atletico de Kolkata 07:00 PM Delhi Dynamos FC

Pathianni Zan, October 23

FC Pune City 07:00 PM Chennaiyin FC