Tiger Woods-a'n beiseina a la nei

Tiger Woods chuan major title 18 zet la thei Jack Nicklaus-a record a tluk theih a beisei thu a sawi chhuak, American golfer hi a hliam a dam tawh a, inkhel leh turin a inpuahchah mek.

Kum 40-a upa Tiger Woods hian major title 14 a la tawh a, mahse a hnungzâng zai a nih avangin kum 2008-a US Open nomawi a chawi hnuah PGA Tour event-ah a la champion leh lo.

Kum 2015 August thla hnua la inkhel leh lo Woods hian Safeway Open-a inlan a tum thu sawi mah se inhliam hlauhthawn thuah a inhnukdawk leh a, a lo kir hun tur tak a sawi chiang thei rih lo.

Zawhna chhangin Woods chuan, "Dawhtheih a ngai a, ka hrilsel ṭha a nih phawt chuan major title hi 18 aia tam lak theih ka inbeisei," a ti. Kum 2014 May thla thleng kha chuan Woods hi world number 1 a la ni a, a inkhelh loh rei tawh em avangin tunah chuan number 802-ah a tla hniam tawh.

Woods chuan sawi chhun-zawmin, "Jack hi ka ngaisang hle a, ka entawn bawk. A record hi a ropui a, khum theih loh ang hiala ngaih a ni; chutihrualin thil theih loh erawh a ni lo thung," tiin a sawi.