Milan-ah Donnarumma a nghet

Gianluigi Donnarumma chuan AC Milan tan hun rei tak chhung a khelh chhunzawm theih a beisei a, kum 16 chauh upa a nihlai aṭanga Seria A club tana goal veng thei hian engtik niah emaw chuan Milan captain a la nih theih a besei thu a sawi bawk.

Zanin dar 12:15 hian San Siro-ah Milan hian league hmahruaitu Juventus an lo mikhual dawn a, Italian club zinga sulhnu nei ṭha pahnih inkhel turah hian goalkeeper Donnarumma leh Juventus si ban nghak Gianluigi Buffon te hi player en hlawh bik an ni ang.

Kum 17-a upa Donnarumma chuan, "Tunah hian kan tlahniam ta duai tihna a ni kher lo a, kan result a ṭha rih lo deuh mai a ni. Kan thawkrim a nih phawt chuan tun hmaa Milan ang kha kan ni leh thei ngei ang tih ka chiang," a ti.

Milan tana match 38 khel tawh Donnarumma chuan sawi chhunzawmin, "Ka agent Mino Raiola hian ka contract thar chung-chang a buaipui mek a, hartsatna nei loin inremna kan siam theih ka beisei. Engtik hunah emaw chuan he club ropui tak captain hi ka la nih ve theih ngei ka beisei," tiin Milan tan hun rei tak khelh a inbeisei thu a sawi.

Donnarumma hi goalkeeper naupangte la ni mah se a theihna a san em avangin club lian tam tak awh rawn a ni der tawh, a naupan lai aṭanga a ngaihsan leh entawn Buffon nen an inhmachhawn tur chu a nghahhlelh thu a sawi tel bawk.