Icardi buaina karah Inter an chak
Inter Milan captain Mauro Icardi leh fan-te boruakin ziaawm lam a pan theih loh karah Italian club-in chanchin lawmawm an nei a, Ningani zan khan Europa League-a an chak hmel hmasa ber hmu turin Southampton chu 1-0 in an hneh.
Inkhelh hmain Inter boss Frank de Boer-a'n Icardi leh fans inkar boruak chuan team-ah nghawng ṭha lo tak a neih thu sawi mah se Argentine striker hi captain armband hreng chungin a khelhtir tho a, San Siro-a Inter fan-ten an captain hi duh lohna au pui tawh loin kut beng chungin an lo lawm - kum 23-a upa striker hian Southampton right back Cuco Martina chetsual vangin hun ṭha nei hial mah se Inter fan-te tan thupha chawina goal a khung thei lo.
Saints chungnunna
Southampton-in khualmual-ah khel mah se an tlangnel a, first half-a an hun ṭha neih James Ward-Prowse leh Cuco Martina ten engmah loa an chantir erawh an ui ve khawp ang. Substitute Charlie Austin chuan Saints tan hun ṭha a nei bawk a, mah se Premier League club vanneih zan a nih loh avangin goal an khung thei lo.
An match hnuhnung pa-thuma a zawna chak lo tawh Inter-in goal hlauhawm tia sawi tur an nei meuh lo a, minute 67-naa an chance neih erawh Antonio Candreva-a'n Southampton player-te angin a hlah ve duh lo. Saints-in goal an chhuah hnuah Inter midfielder Marcelo Brozovic hnawhchhuah niin Claude Puel-a nauten beiseina thar nei mah se Virgil van Dijk leh Austin ten hnai set sawt aṭangin an pet goal lo a, mikhual team an tlawm.
Inter harhna?
Serie A club-in an team talbuai vanglai takin point thum an hlawh chhuak a, Italian club lian an sawi apianga lam hmaih ni ngai lo club hian Saints an hnehna inkhel hi insiamṭhat nan an hmang lo a nih chuan an hmabak a ko tawh hle ang.
Dutch manager Frank de Boer-a'n Financial Fair Play dan an bawhchhiat avangin players ṭha rual Gabriel Barbosa, Joao Mario, Geoffrey Kondogbia leh Stevan Jovetic te a hmang thei lo a, Serie A-a 11-na ni mek club hian an khelmualah Saints an um a ni ber.
Inter Milan hian Europa League-a an match hmasa pahnihah Sparta Prague leh Hapoel Beer Sheva an lo hneh lo tawh bawk a, Saints laka hnehna an chan tak avangin dinhmun ṭha lo nia an sawi De Boer-a thaw huai ngei ang.
De Boer-a hlim
Inter Milan manager Frank de Boer chuan, "Ka nauten fak an phu a ni. First half-ah khan kan khel chhia tih phat rual a ni lo a, mah se chawlhlawk hman a nih hnuah insiamṭhain Candreva hmangin goal ropui kan khung a ni. Brozovic hnawhchhuah a nih hnuah talbuai leh deuh mah ila ka naute khan a tawp thlengin kan goal khung an venghim thei a, ka lawm takzet a ni," a ti.
Kum 46-a upa manager chuan sawi chhunzawmin, "Hun tawp lam minute 10 chhung kan talbuai a, mah se goalkeeper
ṭha tak Samir Handanovic kan nei a ni. Zanina kan khelh dan ang hian kan khelh chhunzawm zel a pawimawh a, group-a pahnihna dinhmun tal luah tur chuan kan chak zel a ngai tawh dawn a ni," tiin beiseina thar a neih thu a sawi.