League hmahruaitu nih inchuh Arsenal, Man City leh Spurs inlan dawn

Premier League nomawi inchuh boruak a inṭan der tawh a, match riat khelh tawh aṭangin team lian fal an la awm lo. Zanin hian London club pahnih Arsenal leh Tottenham an inlan dawn; Gunners hian dar 7:30 hian Middlesbrough an lo mikhual ang a, tlai dar 5:00-ah Spurs chu Bournemouth khelmualah an lenglut thung ang. Pathianni zan dar 6:00-ah hmahruai mektu Manchester City chuan Southampton an lo mikhual dawn bawk.

Boruak ṭha chu...

Season ṭan hma khan David Seaman-a'n Arsenal manager Arsene Wenger chu a hun a liam tawha a ngaih thu a sawi, tunah erawh England international goalkeeper hlui hian Gunners manager hian contract pawtsei se a duh thu a sawi leh tawh - hei hian club boruak ṭhat vanglai a nih zia a pholang chiang.

Kum 66-a upa Wenger hian September 30 khan Arsenal hi kum 20 a enkawl tling chiah a, hemi chhung hian major title pakua a lakpui hman. French manager hian tun season tawp thleng chiah contract a nei tawh a, a hma hun a chiang lo mek.

Arsenal tana kum 14 zet hun lo hmang tawh Seaman chuan, "Arsene hi Emirates Stadium-ah a cham chhunzawm ka beisei, club lam pawhin ani an chelh theih nan hian an theih ang angin hma an la ngei turah pawh ka ngai," tiin amah lo enkawl ṭhin tawhtu manager chungah rinna a nghat lian hle.

Gunners hian an match hnuhnung pasarihah hnehna an chang fai vek a, Nilaini zan khan Champions League-ah an mikhual Ludogorets chu 6-0 ngawtin an sawp. Premier League-ah point 19 hmuin Man City nen an point a inzat mek, hei bakah hian League Cup-ah fourth round lut tawhin an boruak ṭhat vanglai tak a ni.

Arsenal boruak ṭhat lai tak ni mah se Middlesbrough defender George Friend chuan Wenger-a naute chu an hlauh bik loh thu a sawi. Boro hi Gunners laka an league match hnuhnung parukah vawi hnih chiah an tlawm a, vawi li dang chu an inhnehtawk thung - Emirates Stadium-ah point an hlawh chhuak a nih pawhin a mak lo ang.

Sapui hliam?

Barcelona leh Bayern Mu-nich lama hming lo chher tawh Pep Guardiola-a'n Premier League-ah hming chher a tum mek a, beisei angin Spanish mana-ger kawng a awlsam vek bik rih lo.

City hian a zawnin match li chhung chak ni hmel an hmu tawh lo a, an match hnuhnung berah phei chuan Barcelona lakah 4-0 in an tlawm; heti chung hian Pep chuan a naute a khelhtir dan thlak danglam a la tum chuan loh thu a sawi.

Mahni thu duh ve tak Pep-a'n a naute a khelhtir dan
ṭhan anga khel chhuak thei lo lakah zahngaihna a lantir ngai lo. Goalkeeper Joe Hart chu Italian club Torino-ah loan in a chhuahtir a, Catalan club tana khel tlak loa a ngaih Yaya Toure chu City tana inlan tur pawhin a duh chuang lo.

Kum 45-a upa Guardiola hian tun dinhmunah City cap-tain Vincent Kompany chu a chhawr duh lo leh tawh (?) Belgium international hi hliam vangin tun season-ah la inkhel mumal lo mah se Barcelona hmachhawn tur khan a dam chiang tawh chungin squad-ah pawh telh a ni lo - ani aiah hian rawlthar Pablo Maffeo chu bench-a ṭhuttir a ni. Pep hian a mize ngai hmangin City hi result ṭha a neih chhunzawm pui thei a nih chuan mi fak rawn a ni ang a, chutih rualin tuna an dinhmun erawh an suangtuah ang kha chu a ni rih lo ang tih a chiang.

Pathianni zana Southampton an lo mikhual hunah hian engtiangin nge team a siksawi dawn hriat a la ni lo a, a striker neih ṭhat ber Sergio Aguero pawh Nou Camp-ah khan mi-nute 11 chhung chauh a inlantir avangin Argentina international hian inkhel bul a ṭan dawn em tih a chiang lo.

City hian tun hnaiah result ṭha nei hleithei lo mah se point 19 hmuin Premier League hmahruaitu an la ni fan a, an chesual a nih erawh chuan an hnuaia awm Arsenal (19), Spurs (18) leh Liverpool (17) te hian inkhel result pakhat a zirin an dinhmun hi an phet tlu thei reng tawh. Zanina an mikhual tur Southampton hi pariatna an ni thung a, Saints hi Europa League lama Inter Milan hneh lo hlim ve tho an ni - hnehna chan duha tuihal team pahnih inkhel hi a hmuhnawm ang.

Dele Alli a puitling tawh

Tottenham manager Mau-ricio Pochettino chuan Dele Alli chuan a nungchang ṭha lo ṭhenkhat siamṭhain puitlin lam a pan zel thu a sawi chhuak.

Kum 20-a upa Alli hi player theihna sang tak nei ni mah se a nungchang vangin sawisel a hlawh ṭhin, season hmasa khan West Brom midfielder Claudio Yacob a hnek avangin match thum inkhel thei loa hrem a lo ni tawh. Hei bakah hian Europa League lamah Fiorentina defender Nenad Tomovic chu a tlawh lui bawk.

England midfielder hian tun season-ah erawh sawisel a la hlawh lo, club tan match 14 a khelh aṭangin vawi khat chiah yellow card a la hmu a, hnawhchhuah a la tawk lo.

Pochettino chuan, "Player puitling ni tur chuan inzir ngai tam tak a awm a, Alli pawh hian tun hma zawng aiin inkhelah rilru a pe nasa tawh zawk. Theihna sang bik tak nei a nih avangin player ṭha bikah ka chher chhuah theih ngei ka beisei," a ti. Alli hian club leh ram tan tun season-ah goal li a khung tawh.

Argentine manager Pochet-tino hnuaiah Spurs hian club lian dang an el phak a, match riat khelh aṭanga goal li chauh la chhuahin goal chhuah tlem ber an ni. Man City 2-0 a an sawp hnuah West Brom an inhnehtawkpui a, Thawhlehni zan khan khualmualah Bayer Leverkusen chu goal lut loin an inhnehtawk pui bawk - zanin tlai hian Bournemouth lakah result ṭha an beisei ngam ang.