United khan Baggies hmachhawn turin min pui - Klopp

Premier League match ngaih-ven hlawh bera chhal ngamah Liverpool-in an mikhual Man-chester United chu goal khung loin an inhnehtawkpui a, Anfield-a inkhel hmuhnawm lo tak hi Reds manager Jurgen Klopp chuan an tan zirlai ropui tak a nih thu a sawi. Liverpool hian zanin dar 10:00-ah West Brom an mikhual ang.

German coach chuan, "Football dik tak khelhchhuah duh mi kan ni a, Manchester United khan keini aiin tharum an ngah zawk a, an chak zawk bawk. West Brom lakah pawh khatiang match bawk kha kan hmachhawn ka ring a, kan match hnuhnung ber aṭang khan zir tur tam tak kan nei a ni," a ti.

Klopp chuan sawi chhunzawmin, "Kan duh dan ang taka khelchhuak thei tura kan inbuatsaih a ngai a, kan ball chan lai venghim turin theihtawp kan chhuah ang a, United laka khelh ṭhat a pawimawh ang chiahin Baggies laka khelh ṭhat pawh a pawimawh dawn a ni," tiin point thum hlawh chhuah ngei an tum tur thu a sawi.

Liverpool leh United inkhelh ṭumin Jose Mou-rinho-a nauten defensive game an khel a, inkhelh zawhah Red Devils hian an khelh dan avangin sawisel an hlawh. Portuguese manager-in a hmai phih fai nan Liverpool chuan midfielder pahnih Jordan Henderson leh Emre Can te chu tlarhnung pui tura an ruahman thu leh anmahni chauh chu defensive game khel an nih loh thu a sawi.

Klopp chuan Mourinho thusawi chung-chang hi sawilang nghalin, "In-khelh zawhah midangin enge an sawi tih lam ka ngaihtuah lo a, inkhel ber a zawh tawh chuan ṭangkaina a nei lo. Inkhelh zawha thu ṭangkai lo sawi avangin hnehna kan chan leh phah dawn chuang lo; United nena kan inkhel chu a zo tawh a, zir tur kan neih kan zir tawh. Tunah chuan kan tan a ṭangkai tawh lo," tiin Mourinho chhan a tum lo.

Borussia Dortmund boss hlui chuan Baggies chu set piece hmang thiam tak an nih avangin an tan fimkhur a ṭul thu sawi a, "Baggies hian an hmanthiam em em set piece rawn chhawr leh an tum ang a, fans tam takin hei hi kan buaina niin an hre thung. Kan tana chanchin lawmawm erawh awlsam taka hneh chi kan ni lo a, set piece aṭanga goal chhuah lo turin uluk takin kan inveng ang," tiin an khingpuite ṭhatna lai a hriatchian thu a sawi.