Black Caps hmaah India chak lo

New Zealand-in series match hmasa bera hnehna an chan zawh loh hnuin an tlawm nawn duh lo a, Ningani khan India chu run rukin an hneh hram. ODI series match nga khelh turah match hnih khelh a ni ta a, team pahnih hi 1-1 in an inhnehtawk mek.

Feroz Shah Kotla, Delhi-a inkhelah Black Caps an bat hmasa zawk a, over 50-ah run 242 siama mi pakua hlohin target pangai tak an siam. Mikhual team tan run siam miah loin opener Martin Guptill out mah se captain Kane Williamson-a'n team tan innghahna tham a nihzia a pholang a, ball 128-a hmachhawnah run 118 a siam.

Indian bowler zingah Jasprit Bumrah a che ṭha a, kum 22-a upa fast bowler hian hmabak nei eng a nihzia pholang nawn-in over 10-a vawmah run 35 chiah pein wicket thum a la. Inkhel hmasaa che ṭha zingah Hardik Pandya chuan wicket khat pawh la loin over 10 a khawhral a, Amit Mishra a chet ṭhat chhunzawm zel thung. Kum 33-a upa spin bowler hian over 10-a vawmah run 60 pein wicket thum a la.

Beiseina sang tak nen India-in an target umphak ngei tumin bat mah se opener pahnih Rohit Sharma leh Ajinkya Rahane te chu run 30 pawh an siam tlin hmain an out ve ve a, match hmasa zawka India chakna Virat Kohli pawhin run kua bak a tlin lo. India tan captain MS Dhoni-a'n beiseina chhi nung ve leh mah se run 39 bak a tlin bik lo a, run 41 siamtu Kedar Jadhav chu Indian batsman zinga che ṭha ber a ni - mualneitu team hian over 49.3-ah wicket hloh vekin run 236 bak an tlin lo.

Black Caps bowler zingah che ṭha fal sawi tur awm lo mah se Tim Southee chu langsar ber a ni a, kum 27-a upa fast bowler hian over 9.3 a vawmah wicket thum lain run 52 chiah a pe. Pathianni chawhnu dar 1:30-ah India leh New Zealand hi Punjab Cricket Association Stadium, Mohali-ah series match thumna khelin an inhmachhawn leh ang.