United-in season tawp award lawmna nei dawn lo

Manchester United chuan season tawp apianga an neih ṭhin, Players' Awards sem zan chu a hranpain an hmang dawn lo - season hmasa khan an lo hmang lo tawh bawk.

United hi season hmasa khan Premier League-ah pariatna an ni a, FA Cup-ah an champion thung. Tun season-ah season hmasa aia chhiain league season chu an khar dawn chiang tawh.

Team 20 inelna EPL-ah United hi 16-na an ni mek a, 1973-74 season-a an relegate hnua season an khar chhiat ber a ni dawn. Europa League-ah erawh final an lut tawh a, an champion chuan Champions League an khel ang.

Mahse, league lama an dinhmun avangin United hi uang thei dinhmunah dingin an inngai lo a, awards sem zan an hmang dawn lo - heng hunah hian men's, women's leh youth team-a che ṭha, mimal player-te chawimawina hlan ṭhin niin, Players’ Player of the Year pawh thlan ṭhin a ni.

United hi mipa team lam an chet chhiat viau laiin hmeichhe team erawh an pangngai viau a, Women's Super League-ah pathumna niin, Champions League khel turin an tling tawh a, FA Cup final an lut tawh bawk.

Red Devils hian Europa League-ah an champion a nih pawhin, Manchester khawpui kawtthlera kawng zawhpui lo turin thutlukna an siam tawh bawk a, Carrington training ground-ah an lawm thung ang.

United midfielder Bruno Fernandes chu season hmasa khan Club Player of the Year atan thlan a ni a, hmeichhe lamah Ella Toone thlan a ni bawk. Award sem zan hmang dawn lo mah se, tun season-ah pawh award hrim hrim hi chu an sem dawn tho.

Manchester United website-ah vote thlak theihin hawn mek a ni a, mipa leh hmeichhe Player of the Season bakah Goal of the Season te thlan tur a ni. May 25, Pathianni zana an league match hnuhnung bera Aston Villa an mikhual hunah, khelmualah award hi sem a ni ang.