LBS Suzuki CYMA Football: Hmuhnawm tur Lungdai Vs Ramhlun South

LBS Suzuki 22nd Inter Branch YMA Football Tournament third round chu vawiin aṭangin khelh ṭan a ni dawn a, vawi hnih champion tawh Ramhlun South leh Lungdai te vawiin chhun dar 12:15 hian Muallungthuah an inkhel dawn. Malsawmfela leh R. Lalthanmawia (Amawia) telna Ramhlun South hi a buk rit zawk ni mah se Lungdai hi chetsual theihna an ni.

Lungdai hian first round aṭanga an khelh ṭan avangin match hnih an khel der tawh a, first round-ah New Serchhip Venglai 4-1 in an hneh a, second round-ah champion lai Venghnuai 7-0 in an sawp leh bawk. Team langsar tak ni loin Lungdai hi team khelh harsa tak an ni a, I League 2-a Diamond Harbour champion puitu Lalngaihsaka'n hmun pawimawh a chang dawn.

Ngaihtea ringawtah an innghat bik lo a, tawnhriat ngah zawk Lalbuatsaiha ten team an la ho a; Caleba C. Lalawmpuia goal hmaah a hriam a, match hnihah goal khung ve vein tun inelnaah goal nga a khung tawh. Mahse, an khingpui Ramhlun South hi match khat chauh la khel chunga goal 12 khung tawh an ni.

Kum 2008 leh 2017 champion Ramhlun South hian Airfield 12-1 in an sawp a, an ṭhat piah lamah an tumpui an nem ve bawk. Tlarhmaah Sawmfela an nei a, Kerala Blasters winger Amawia an neih bawk avangin attacking ṭha tak khel thei tura beisei an ni. Airfield an hmachhawn ṭumah erawh goal nga khungtu Lalremruata'n goal a khung hnem ber zawk a, ani hi Aizawl FC leh Chanmari FC-ah te hmun pawimawh a chang ṭhin.

Ramhlun South goal nawrtute an ṭha a, tlarhnungah Mizoram tan pawha khel tawh Lalmawizuala nei bawk mah se an tlarhnung erawh a phui ṭha bik lo. Hei tak hi vawiin inkhel tihmuhnawmtu turah a ngaih theih.

Muallungthua inkhel tur dang pahnih pawh third round ve ve a ni dawn. Chawhma dar 10:00-ah Armed Veng South leh Keiṭum te an inkhel dawn a, AVS hi player neih ṭhat avangin champion rinkai an ni pha. Armed Veng South hian Vangtlang 3-1 a hnehin bul an ṭan a, match hmasa berah khel ṭha tawk lo mah se match hnihnaah erawh Dawrpui 5-0 in an sawp.

Ramdinmawia leh Lalhmangaihsanga (Papuia) te telna AVS hi insiamṭha viau tawhin lang mah se vawiin an khingpui tur erawh Keiṭum an ni a, Vangtlang ang thoa tharum ngah tur an ni. Muallungthu ni sa hnuaiah chuan Keiṭum hian AVS hi an barakhaih ve thei tlat. Chawhnu dar 2:30-ah Kanan leh Maubawk te an inkhel dawn a, MPL club nei Kanan buk a rit zawk ang.