LBS Suzuki CYMA Football: Republic Vengin Chanmari an pet tla nghal

LBS Suzuki 22nd Inter Branch YMA Football Tournament 2025-ah Chanmariin an match hmasa berah Republic Veng an hmachhawn a, 2019 champion hi an vawi khat khelhnaah an tla nghal. Lalsangzuala Hmar enkawl Republic Veng hi 2-0 in an chak a, F. Lalrinpuia leh T. Malsawmsanga ten goal an khung.

Chite Veng Playground-a inkhel hi second round chauh ni mah se champion tawh pahnih inkhel a nih avangin ngaihven a hlawh a, beisei angin inkhel pawh a hmuhnawm. Republic Vengin bul an ṭan ṭha a, minute hnihna lekah Mizoram tana vawi tam goal khung tawhtu Valpuia'n freekick aṭagnin mawi zetin a khung nghal.

Republic Vengin inkhel thunun zawk mah se goal an khung belh theih loh avangin nuam sain an khel thei lo a, Chanmari midfielder Rochhingpuia'n freekick aṭanga a hun ṭha neih a hmang ṭangkai thei lo. ISL player Jerry Mawihmingthanga'n theihna nei sang player a ni tih a lantir a, uluk taka ven karah a theihna hmun tur a awm leh ṭhin.

Jerry hian second half ṭantirh lamah goal-ah ṭha zetin pet mah se Republic Veng keeper RS Lalawmzuala'n ṭha takin a dang ṭha a, Republic Veng tan defender Laltluangliana a khel ṭha bawk nen Chanmariin chance an insiam thei meuh lo. Republic Veng erawhin chance an nei nual thung. Hla phuah thiam Biakdika (BD-a) fapa VL Krosschhuangzela Ralte-in hun ṭha bik a hlah.

Second half-ah Republic Vengin ISL club Jamshedpur midfielder C. Lalhriatpuia an luhtir a, C. Hriata awm hnuah Republic Vengin chance ṭhahnem tak an neih belh. Lalmuansanga'n goalkeeper MS Dawngliana chauh a hmachhawn hnuah a khung lo ve ve a, C. Lalfakzuala leh C. Hriata ten goal ban an pet per ve ve bawk.

A tawpah Chanmari defender Lalrinchhana Tochhawng leh keeper Msa an inringthul a, Republic Veng rawlthar T-a va inrawlh hmanin chak nemnghehna goal a khung. Republic Veng hian third round-ah Sreenidi Deccan player Lalromawia telna Samlukhai an hmachhawn ang.