Yamal-a'n contract thar a ziak ang - Deco

Barcelona sporting director Deco chuan an player chhuanvawr, kum 17 mi Lamine Yamal chuan contract thar a ziah tur thu a sawi a, July thlaa kum 18 a tlin hunah contract thar hi a ziak ang.

Yamal hian kum 2026 thleng bak Barcelona-ah hian contract a nei tawh lo a, Barca ṭantute chuan an club hian an player duhawm hi contract thar pe vat vat se an duh - tunah chuan an hriat duh tak thawm rimawi an hre ta.

Deco chuan, "A pawimawh ber chu an awmna hmuna player an hlim hi a ni a, Lamine tan Barcelona aia awmna tura ṭha zawk hi ka hre lo a ni. He hmuna sei lian a ni a, Barcelona khaw chhuak a ni bawk.

"A ṭhiante nen he club hi bung thar min kaipui theihna chance an nei a, Lamine-a dinhmunah hian ding ta ila, Barcelona-a cham zel hi ka duh ang," a ti a, an club academy chhuak player chelh dan a thiam hle.

Barcelona midfielder hlui Deco chuan sawi zawmin, "Contract thar chungchangah eng buaina mah a awm lo ang. Kum 2026 thleng contract a la nei a, a thar chu a ziak vat ang," a ti.

Yamal hian kar khatah £27,083 (Rs. 30,78,061) a hlawh mek a, team tana a ṭangkaizia ngaihtuah chuan a hlawh hi a tlem hle - Barcelona-a hlawh hnem ber Robert Lewandowski chuan kar khatah £542,525 a hlawh mek!

Spain international hian Barca-ah contract thar a ziak a nih chuan a let 10 aia team mahin a contract hi a san a rinawm - tun season-ah match 52 khelin goal 16 a khung tawh a, assist vawi 24 a nei bawk.

Barca player pawimawh zingah kum naupang, hmabak nei êng tak tak an awm nual. Centre back pawimawh Pau Cubarsi chu kum 18 mi a ni a, left back Alejandro Balde chu kum 21 a ni a, midfielder ṭha mi Pedri pawh kum 22 chauh a ni.

Kum 22 mi Fermin Lopez, midfielder Gavi (kum 20), defensive midfielder Marc Casadó (21), winger Pau Víctor (23) leh right back Héctor Fort (18) te pawh khelhna hmun chang tam rih lo mah se, Barca-a hmabak nei êng tak vek an ni.

Deco chuan, "Hma an sawn dan leh nuam an tih dan ka thlirin, tumahin he club hi chhuahsan an châkin ka ring lo. Kan player tam zawk contract kan pawtsei tawh a, a dang pawh kan en zel ang.

"Nikum khan player chân thei kan nih loh thu ka sawi a, tunah pawh kan dinna a la ngai reng," a ti a, inhralh ṭhen aiin squad sawh ngheh chu an thupui a nih thu a sawi.

Deco chuan a pawp lai a awm a nih chuan an thuam ṭhat tur thu sawi telin, "Squad kan thuam chak thei a nih chuan, chu tluk a awm hleinem. A pawimawh ber erawh, kan hun lo kal zel tur atana nghet taka indin hi a ni.

"Tun dinhmunah Raphina leh Lamine hi kan ring mah mah em aw, ka ti ṭhin a, an khelh theih loh changa an hmun ruak luah tur, an khelh dan phung anga khel thei chu kan mamawh mai thei. Chutihrual chuan kan squad hi an in 'balance' tawk viau thei bawk a, youth team aṭangin rawn chho mai thei an la awm nual bawk," a ti.

Barcelona hian season duhawm tak an hmang mek. Champions League semifinal-ah tla mah se, Spanish Super Cup leh Copa del Rey-ah an champion a, La Liga-ah champion thei dinhmunah an ding mek bawk.

Catalan club hian league match thum chiah khelh tur an nei tawh a, pahnihna Real Madrid aiin point sarih ngawtin an sang zawk. Match khat an chak leh chuan an champion tawh dawn tihna a ni.

Barca hian zanin dar 1:00-ah Espanyol lenchilhin, Catalan derby an khel dawn a, zanina champion lawm thei dinhmunah an ding tihna a ni - zanin an inkhelh hma hian an champion thei bawk.

Nizan khan Real Madrid chuan Real Mallorca an hmachhawn a, an result kan hre hman lo. Carlo Ancelotti naute hi an tlawm a nih chuan Barca hi an champion fel der tawh thei.

Barca sporting director Deco pawh an thlen chinah a lawm hle. Portugal international hlui chuan, "Season ṭantirah kan inthlak danglam nual a, kan rilru ber chu team ṭha ber berte nena inel leh kha a ni.

"Team ṭha tak Real Madrid nena inel kan ni miau a, kan beisei aia ṭha mahin season kan hmang a ni. Champions League final kan luh lohna pawh thil ho tê chauh a ni a, season tawp hnaih lama eng nomawi pawh chawi thei dinhmuna awm kha kan tum sa a ni.

"Tunah phei chuan Spanish Supercopa leh Copa del Rey nomawi kan kawl ran tawh a ni," a ti a, season ṭha tak an hman thu a sawi.