Liverpool-in Frimpong lakluh tum

Premier League champion Liverpool chuan Bayer Leverkusen aṭangin right back Jeremie Frimpong lakluh an tum a, khawthlang media ṭhenkhat chuan Reds hian German club hi an dawr ṭan tawh niin an sawi.

Kum 24 mi right back hi Real Madrid pana chhuak tur Trent Alexander-Arnold ang thoa tlarhma puih nuam ti tel a ni a, tun season-ah Leverkusen tan inelna hrang hrangah match 48 khelin, goal nga a khung a, assist 12 a nei.

Season hmasaa Bundesliga leh German Cup champion an nih khan match 47 khelin goal 14 a khung a, assist 12 a nei bawk. Nikum lawkah khan kum 2028 thleng khel turin contract thar ziak mah se, pound maktaduai 29.6-a lei theihna dan a inziak tel a, a tlawm hle.

Frimpong hian Manchester City academy-ah kum kua zet hun a lo hman tawh avangin English football-ah a mikhual lo. Khatihlai khan Liverpool chuan an academy-a awm turin an lo sawm daih tawh a, mahse, a chhungte awmna nen a inhlat avangin City-ah a awm ta zawk.

Kum 24 a tlin meuh chuan Reds bawk an lo lang nawn a, Liverpool hian chipchiar takin a khelh dan phung an zirchiang vek a, Arne Slot-a'n a duh. Frimpong pawh hian Liverpool zawm a châk a, club an inrem theih chuan Anfield pana puanthuah tel turin a inpeih.

Dutch fullback hi Liverpool midfielder Ryan Gravenberch nen ṭhian ṭha tak an ni a, Virgil van Dijk leh Cody Gakpo te nen Netherlands squad-a an awm ho ṭhin avangin an inngaina sa bawk.

Reds hian Bournemouth left back Milos Kerkez an thlithlai mek bawk a, left back dang pawh an melh tho niin an sawi. Cherries centre back Dean Huijsen hming pawh Anfield pan tura sawi rik a ni a, tun nipui transfer chu Liverpool hi inthuam chak an tum viau niin a lang.