Team ṭha Durtlang leh BVT te an chak

LBS Suzuki CYMA Football-ah nimin khan champion rinkai Durtlang leh Bethlehem Vengthlang te an inkhel a, hnehna an chang ve ve. Durtlangin Mamit Hmar Veng 2-1 in an hneh a, Bethlehem Vengthlangin Falkawn 4-0 in an sawp thung.

Durtlangin 1st Bn MAP Ground-ah bul an ṭan ṭha a, Lalfelkima leh Lalliansanga te hmangin minute 25 chhungin goal hnih an khung hman a, Mamit Hmar Veng tlarhnung an ṭhiat ṭha hle. Durtlang ṭhatna ber hi tlarhnung ni mah se a phui tluan bik lo a, Henry Lallawmsanga hmangin minute 58-naah Mamit Hmar Vengin siphurh an sut ṭhen a, inkhel a nun phah hle.

Durtlang nuam sain an chak lo a, Bethlehem Vengthlang erawhin Falkawn an hmachhawn harsatna nei loin an chak. BVT tan Lalmuanpuia, Lalrammawia, Emmnuel Lalhruaizela leh K. Lalramzauvaten goal khat ṭheuh an khung a, Lalbiaksanga Colney enkawl team hi 4-0 in an chak.

Muallungthu lamah goal a lut hnem a, tun hmaa team ṭha ṭhin Vaivakawnin West Serzawl 14-0 in an sawp. Bawngkawn tan MS Dawngliana'n (Dawngtea) hattrick a siam a, Kawnpui Bangla Veng 3-0 in an hneh. Bethlehem pawhin bul an ṭan ṭha a, Zemabawk West 9-0 ngawtin an sawp.