Bungkawn lakah Luangmual tho chhuak

EverHome Pro Volleyball League khelh laiah, set an hloh hmasak hnuin Luangmual an tho chhuak a, an khingpui Bungkawn chu 11-15, 15-12, 15-12, 17-15, 15-5 (4-1) in an hneh.

LPS Arena, Falkland-ah Rithegaa G leh Bungkawn spiker Elisian Medai an inel tawk hle a, Luangmual captain Lalramliani'n hun pawimawhah mawhphurhna hlen chhuakin team a khai ding a, an chak theihna hnar a ni.

MVA Cup final-ah Luangmualin set hmasa pahnih an hloh hnuah Bungkawn an hneh a, Pro Volleyball atan Tamil Nadu aṭangin 5ft 6in-a sang Rithegaa an la lut. Ani hian Mizo leilunga a inkhelh hmasak berah vawi 22 vaw tlain point sarih a hloh a, Bungkawn player pawimawh Elisian chuan point 22 tho hmuin ṭum riat a tisual ve thung a ni.

Pro Volleyball 2024 best spiker Rami'n point 11 hmuin point thum a hloh a, mi mala hmu tam ber ni lo mah se net bula lehlam ball vuak dangtu leh team boruak chawi kangtu ber a ni a, Kuriz Player of the Match atan thlan a ni.

Luangmual tan tun hnaia hmasawn Remlalnghaki'n point ruk a hmuh chanve tisualin, Lalbiakngheti'n vawi nga hlap tlain point hnih a paih bawk.

An intawn hnuhnun ber ang bawkin Bungkawnin harsatna an tawk leh a, a tir lamah nung takin khel mah se set hnihna aṭangin an tlo tawk lo. Set thumnaah 6-2, set linaah point khat hmu belha tlang thei turin hun ṭha vawi hnih nei mah se, a tawp set li an hloh zawn.

Elisian thlawptu F. Lalparmawii'n point 12 hmuin point riat a hloh a, set lina aṭangin chet a harsat. Luangmual angin Bungkawnin point hmu mai thei player an ngah tawk lo a, a tawp lamah Lalchhandami'n point li a hmuh chanve a hloh na a, awmzia a nei zo lo a ni.

Hmeichhe team pathum an inel a, league an khelh chhungin point 15 game hmangin set nga zel an inkhel ang. May 19, Thawhṭanni zanah league zo felin Luangmual leh team thar Jimmy Kanan an inhmachhawn ang.