Cavaliers hnehtu Pacers

Indiana Pacers chuan team ṭha leh chak tura rinkai zawk Cleveland Cavaliers hnehin NBA Eastern Conference finals an lut fel der, best of seven series khelh tur chu 4-1 in an la.

Nimin zing khan Pacers hian Cleveland hi 114-105 in an hneh, an chak theih nan hian Tyrese Haliburton chuan point 31 a nei a, ani bakah hian Pascal Siakam (21 points), Andrew Nembhard (18) leh Aaron Nesmith (13) te an langsar bawk.

Indiana coach Rick Carlisle chuan, "Tun season atan chuan Cleveland Cavaliers hi team ṭha ber zinga mi an ni a, kan inkhelh dawn khan mi tam zawk chuan keini lam hi chak lo turah min ngai bawk.

"Regular season hmang ṭhatu an nih avangin sang tak thleng chhunzawm tur pawhin an duhsak awm a, hetianga an zinkawng a tawp hi pawi ka tihpui hle. Mahse, keini lam khan chak tumin kan bei ve tho.

"Ka naute hian hlauh an nei ngai lo a, theihtawp tak meuh chhuahin a tawpah chuan kan dingchang leh ta zawk. Hnehna chan châka tuihal leh bei nasa zawk kan chak tih pawhin ka sawi ngam," tiin a sawi.

Pacers hi seeded palina an ni a, an hneh tak Cleveland hi seeded pakhatna niin playoff khel tur pawhin tling hmasa an ni. Carlisle-a naute hian an match lehpekah chuan Boston Celtics leh New York Knicks inkhela chak zawk an hmachhawn leh ang.

Season hmasa Eastern finals-ah khan Celtics hian Pacers hi an lo hneh tawh, kuminah erawh conference finals lut tur chuan thil mak an beisei a ngai. Knicks lakah 3-1 in an hniam mek a, vawi khat an chetsual zauh chuan an zinkawng a tawp dawn a ni.

Cavs tana point 35 neitu Donovan Mitchell chuan, "Sawi tur dang kan nei lo, min ṭantute kan tih lunghnur avangin ngaihdam kan dil. Kan hna leh mawhphurhna kan hlen chhuak zo lo a ni," tiin a sawi.

Inkhel dangah Oklahoma City Thunder chuan Shai Gilgeous-Alexander-a point 31 neih hmangin Denver Nuggets chu 112-105 in an hneh a, Western Conference semifinal series khelh laiah 3-2 in hma an hruai mek.

Nuggets centre Nikola Jokic-a'n point 44 ngawt nei mah se a team a chakpui zo lo a ni. May 16, Zirtawpni zing dar 6:00 hian game 6 an khel leh dawn a, an beiseina chhi nung turin Nuggets tan tlawm a thiang tawh lo.