Sinner leh Alcaraz an kal zel

Thla thum chhung hrem a nih hnuah pawh Jannik Sinner chuan a thiam a la theihnghilh lo, a hma a ding a hneh chho zel. Thawhlehni zan khan Sinner hian Francisco Cerundolo 7-6 (2), 6-3 a hnehin Italian Open quarterfinal a lut.

Seeded 18-na Cerundolo hi tun hnaiah a khel ṭha hle a, clay court bikah phei chuan vawi 18 lai hnehna a chang tawh - Sinner nen ngei pawh an intawn hnuhnung zawkah a hneh.

Kum hnih liam ta khan Italian Open last 16-ah bawk hian an lo inkhel tawh, hemi ṭum hian Sinner a chak lo. Kuminah erawh thawnthu ziah danglam a ni a, world number 1 a chungnung ta zawk.

Italian tlangval Sinner chuan, "Hun rei tak chhung ka nghak a, a tir lamah khan beisei phak lo mah ila tunah chuan ka khelh dan phung pangngai ka nei let leh ta.

"A nihna takah chuan thla thum chhung inkhel thei loa awm kha a hrehawm takzet a, tun anga ṭha hian ka khel leh thei ang em tih pawh kha ka ngaihtuah ngam lo," a ti.

Sinner hian a match hnuhnung 24 zetah hnehna a chang vek - nikum Ocotber hnu lamah tlawm a la nei lo. Italian Open bak hi chu French Open hmain inbuatsaihna tournament khelh tur a nei tawh lo thung.

Inkhel dangah Carlos Alcaraz chuan Karen Khachanov chu 6-3, 3-6, 7-5 in a hneh a, quarterfinal a invaw kai ve bawk. A hmabak chu Jack Draper a ni dawn, season tir lam khan player pahnih hi an lo intawng tawh bawk.

Alcaraz hi awlsam taka chak a ni lem lo, set thumna an khelh lai phei chuan a khingpuiin a service a chhuhsak tur hi vawi hnih ngawt a inchhanhim a, a tawpah erawh a vannei zawkah a ṭang.

Grand Slam vawi li champion tawh Alcaraz chuan, "Hliam leh na chu ka nei lo, mahse ka taksa a chau a, ka thothang a ṭhat tawk loh avangin inkhelh a harsa. Ball ka hmachhawn apiang mai kha ka huphurh ṭhum vek zel," tiin a khelh ṭhat tawk loh thu a sawi.

Alcaraz leh Sinner te hi tunlai player ṭha berte zinga mi an ni a, clay court inelna lian French Open an khelh hunah pawh rinkai an ni dawn. Italian Open khelh laiah pawh an inel na dawn, player ṭha Alexander Zverev a la dam tih erawh hriat tel a ngai thung.