Quarterfinal-ah Sabalenka a lut

Aryna Sabalenka chuan harsa angreng takin Marta Kostyuk a hneh a, clay court inelna khelh lai Madrid Open quarterfinal a lut. Inkhel dangah Jasmine Paolini leh Peyton Stearns te pawhin an khingpui ve ve an hneh ve bawk.

Campo Centrale-a inkhelah Sabalenka hian set khatna chu a la harsa lo, game khat chiah a hloh. Mahse, set hnihna erawh a hautak hle a, darkar hnih leh minute nga an inkhelh hnuah 6-1, 7-6(8) in a chak.

World number 1 Sabalenka hian a match lehpekah chuan Zheng Qinwen a hmachhawn ang, Chinese nula nen tun hma lama vawi ruk an inkhelh tawh hoah a chak vek a, tun ṭumah pawh hian rinkai zawk a ni ang.

Belarus nula Sabalenka hian Grand Slam dawta inelna ngaihhlut Masters 1000 huangah a match hnuhnung 15 zetah hnehna a chang a, hetih chhung hian Miami leh Madrid Masters nomawi a chawi nghal bawk a ni.

Inkhel dangah seeded parukna Paolini chuan Diana Shnaider chu 6-7(1), 6-4, 6-2 in a hneh a, anmahni rama inkhel an nih avangin ṭantu a ngah a, beisei pawh a nei sang chhunzawm ang. Peyton Stearns pawhin seeded 16-na Elina Svitolina chu 6-2, 4-6, 7-6(4) in a hneh ve bawk.