Flick-a thawhlehna ropui chu!

Kum 60 mi ni tawh mah se, Hansi Flick-a'n top flight league-ah coaching zinkawng a zawh ṭan har a, team enkawl a la ngah lo hle. Red Bull Salzburg, Germany leh Bayern Munich-ah te assistant coach a nih hnuin kum 2019 khan Bayern manager a ni ve chauh a, coach puitling a nih hmasak ber a ni.

Bayern-in Niko Kovac an ban avanga coach lailawka an ruat, hna a thawh ṭhat em avanga coach ngheta an lakluh zui kha a ni a, kum 2021 thleng a cham - a enkawl chhunga nomawi pakua chawi tur awmah pasarihah a champion pui thei!

Flick hian 2019-2020 season-ah phei chuan treble champion a nihpui a, match 86 a kaihhruaiah vawi 70 hnehna chanpuiin, vawi sarih chiah an tlawm a, vawi kua an khingpui an inhnehtawkpui.

Mahse, Flick hian Germany enkawl a châk avangin Bayern a chhuahsan a, a beisei ang erawhin thil a kal lo. Match 25 a kaihhruaiah vawi 12 chiah a chakpui a, vawi sarih draw neiin, vawi ruk an tlawm.

World Cup 2022-ah phei chuan Flick hian group stage aṭangin Germany a tlakpui a, September 2023 khan Japan chu friendly match-ah 4-1 in an ngam lo zui. Germany FA-in an dawh reng thei lo a, Flick an ban.

Flick a chawl vang vang a, May, 2024 khan Barca a pan. A tirah rinhlelhna nena thlir ni mah se, nomawi pathum nen amah ringhleltute a chhanglet ta - Flick a tho leh ta a, ropui takin a ni, a thawhleh ni!

German coach chuan, "A êng zawngin thil kan thlir ṭhin a, chu chu kan training session-ah te pawh hmuh theihin a awm ṭhin. Barcelona coach kan nih chuan champion a ngai a, nomawi pathum kan chawi thei hi ka lawm takzet," a ti.

Flick chuan rilru paukhauh pawimawhzia sawi zuiin, "Rilru lam a inpeih hi a pawimawh em em a, kum tluanin chutiang tur chuan kan inbuatsaih. January thlaah Super Cup kan champion a, kha khan inrintawkna nasa tak min pe.

"Ka player tam takin an theihna sang ber an thleng lai hmuh hi nuam ka ti a, tam takin hma an sawn tih kan hmu bawk," a ti a, rilru huaisenna, infuihphurna leh theihtawp chhuahna chu an champion chhan a nih thu a sawi.