Khawzawl Vengtharin Lengpui an pet tla

LBS Suzuki 22nd Inter Branch YMA Football 2025 aṭangin champion rinkai zinga mi Lengpui an tla. Aizawl khaw pawn aṭanga champion tawh awmchhun Lengpui hi RG Stadium-ah Khawzawl Vengtharin an pet tla a, nimin lamah Khawzawl an vul hle.

1st Bn MAP Ground lamah Khawzawl Zuchhip-in Saitual Venglai lehthalin 5-1 in an sawp a, fourth round (last 32) an lut ve bawk. Tun tun ṭum inelnaah group G hi group of death-a chhal theih an ni a, Khawzawl team ṭha pahnih bakah hian Chhinga Veng, New Serchhip Chhekhnai, Republic Veng leh Samlukhai te an la dam.

Kum 2006 champion Lengpui hi tun hnaia an ṭhat leh ber ṭum a ni a, amaherawhchu third round-ah anmahni ang bawka team ṭha Khawzawl Vengthar an hmachhawn tlat. Chutihrualin hun tawp lamah erawh team ṭha zawk Lengpui goal bawh a na a, goal hmaah an vannei tawk lo a, Khawzawl defender R. Lalhmachhuana a che ṭha ve bawk. Penalty shootout hmangin chak zawk zawn a ni a, Lengpui player zinga tawnhriat nei ṭha ber leh captain Lalchhuanmawia'n khung loin Khawzawl Vengthar lamin an khung vek.

Nimin inkhel dangah vawi thum champion tawh Electric Vengin Ṭhiak 14-0 in an sawp a, Lalhlimpuia (Tata) leh Lalbiakhlua (Biaktea) ten goal li ve ve an khung a, Samuel Malsawmkima'n hattrick a siam bawk.

Team ṭha dang Bawngkawn pawhin Darlung 8-0 in an sawp a, Kawnpui Bangla Veng laka hattrick siamtu MS Dawngliana'n goal nga khungin mual dinglama hmuhnawm H. Lalmuankima'n goal khat a khung bakah Bengaluru FC midfielder Lalremtluanga'n goal hnih a khung bawk.