Mizoram an chak nuam sa

Swami Vivekananda Men’s U20 National Football Championship-ah Mizoramin Maharashtra 4-0 a sawpin bul an ṭan a, nimin zing khan Himachal Pradesh 8-0 in an sawp leh bawk. Lalrindika Hmar hote tan quarterfinal luh theihna kawng a inhawng zau a, mah se 8-0 ngawt an chaknaah captain leh goalkeeper Joel B. Lalramchhana chu hnawhchhuah a ni.

Ashrama Ground, Chhattisgarh-a inkhelah hian Himachal Pradesh-in defensive game an khel a, an inrem phui tlat avangin Mizoramin goal an khung thei bik mai lo. Minute 31-naah Himachal Pradesh-in an nawr let thut a, captain Ramchhana'n goal venhim a tumna lamah hnawhchhuah a nih phah.

Mahse, player 10-a khel chung pawhin Mizoram an la ṭha zawk. Chanmari FC midfielder Joel Ramengmawia'n first half tawp hmain goal hmahruai a khung a, half time-ah Lalrindika Hmarin a tih tur tichiahin second half-ah Mizoram team ṭha zawk hmuh a ni.

Joel hian goal li khungin hattrick a siam a; Mesak C. Lalrinngheta, John Lalrinawma, Stephen Ngurchhuanmawia leh Ngurthanmawia ten goal khat ṭheuh an khung. Mizoram hian second half-ah goal li dang an khung belh a, 5-0 in an chak.

Mizoram coach Lalrindika Hmar chuan, "Tunah hian kan striker neihchhun Hruaia a inhliam a, Ramchhan'n red card a hmuh bawk avangin kan squad a pan ta hle. Mahse theihtawp kan chhuah zel ang. Red card hmu chhunga kan player-ten theihtawp an chhuah a, hnehna kan chang hi ka lawm khawp mai," tiin Vanglaini a hrilh.

Mizoram hian May 18, Pathianni tlai dar 4:15 hian anmahni ang bawka point ruk hmu Tripura an hmachhawn dawn a, hnehna an chang a nih chuan quarterfinal an lut thei ang. Chutihrualin Tripura an chak thung erawh chuan Mizoram hi an tla thei thung.