Ratcliffe-a'n sum a hloh hnem

Manchester United neitu zinga mi Sir Jim Ratcliffe chuan nikum khan a hausakna hmun lia ṭhena hmun khat vel a hloh niin 'The Sunday Times' chuan a tarlang. Kum 72 mi Ratcliffe hausakna hi pounnd tluklehdingawn 23.519 nia chhut ṭhin a ni a, thla 12 chhungin a hausakna hi £17.046tld-ah a tla thla.

United Kingdom-a mi hausa 350 zingah Ratcliffe hi palina la ni pha tho mah se pasarihna aṭangin a tla thla thung. February 2024 khan Ratcliffe-a company Ineos Group chuan Man United-a neitu nihna 27.7% chu £1.25tld ($1.6tld) in an lei a, football inkaihhruaina zawng zawngah thuneihna an chang.

British billionaire hi Man United enkawlna kawngah sawiselna a dawng nasa a, sum inrenchemna ṭum hnih kalpui tawhin club hnathawktu ṭhahnem tak an ban. Ratcliffe hian inrenchemna an kalpui loh chuan kumin kumtawpah phei chuan club-in sum a neih loh tur thu a sawi. Mahse, Ratcliffe bawk hian Old Trafford bul chiahah mi nuai khat lenna sak an tum thu a sawi a, sum sen ngai zat hi pound tluklehdingawn hnih a ni.

Ratcliffe-a sum dinhmun a tlak hniam laiin British infiammi Rory McIlroy, Anthony Joshua, Sir Andy Murray leh Harry Kane te sum dinhmun a ṭha thung. Golfer McIlroy chu kum 40 hnuai lam athlete zingah a hausa ber a, a sum neih chu £225mtd aṭangin £260mtd-ah a pung. British mi hausa zingah 19-na a ni.

Boxer Joshua chu 24-na a ni a, September thlaa Daniel Dubois nena an inhmachhawn hnuah la inhnek leh lo mah se a sum neih hi £195mtd a ni. Murray-a'n nikum August thla khan tennis a chawlhsan a, tuna a sum dinhmun hi £110mtd niin 35-naah an awm.

England football captain Harry Kane-a'n a vawi khat nan nomawi a chawi a, Bundesliga-ah Bayern Munich a champion pui. Kane-a sum dinhmun hi £25mtd aṭangin £100mtd a pung chho a, British hausa 38-na a ni.