Bungkawn hnehtu Kanan

EverHome Pro Volleyball League hmeichhe inelna huangah Jimmy Kanan chuan Bungkawn chu 15-9, 15-9, 15-10, 15-6, 11-15 (4-1) in an hneh a, inelna lian an hmachhawn hmasak berah result ṭha an nei nghal.

Ningani zan LPS Arena, Falkland-a inkhelah Punjabi tleirawl Jashanpreet Kaur leh Lalhriatpuii'n point 32 thawk chhuak dunin an team an chakpui a, an khingpui Bungkawn hi match hmasa lama chesual tawh an nih avangin Kanan hian final an lut.

Tun season Pro Division-ah hmeichhe team pathum an awm a, Pro Volleyball-ah Kolasib an tel theih loh avangin chawpchilh takin Jimmy Club an inziak lut a; tawnhriat nei tawhte leh state dang aṭangin player an la khawm a, team ṭha tak an din.

Kum 17 mi Jashanpreet chuan Ninganiah Aizawl rawn lutin zanah a inkhel nghal a, point ruk hlohin vawi 20 a vaw tla a, Kuriz Player of the Match atan thlan a ni. Veikhawr Hriati'n ṭum 12 hlap tlain point li a hloh a, ṭha takin Kanan team tan an inthlawp.

Bungkawnin an duhthusam puitlin lo bawkin championship an thlah liam leh a, Elisian Medai chuan tum 16 vaw tlain point li a hloh. Mimalin che chhe lo mah se a ṭanpuite zingah point thum aia tam hmu phak an awm lo a, team chakpui nan a tawk zo lo.

Thawhlehni khan hmeichhe inkhel hmasa berah Bungkawn tlawm tawhin set an lak hmasak hnuah champion lai Luangmual lakah set li an hloh zawn. Team pathum zinga state pawn player nei ve lo awm chhun Bungkawnin league an khel zo a, Mizoram inelna sang bera team hlun tak ni mah se an tel hmasak ber 2019 aṭangin an la champion lo a ni.

Jimmy Club-in team thar an nih hriat lohin inkhel an thunun a, set li an lak zawh rualin final an lut chiang nghal a ni. May 19 khian league khar nan Luangmual nen final urlawk nan an intawng dawn a, May 23, Zirtawpniah champion nih inchuhin an inkhel nawn leh ang.