Real-in Huijsen an la lut dawn

Tun season-a eng champion nomawi mah chawi lo tur, Real Madrid chuan squad inthuam chhah hna an thawk zel a, Bournemouth centre back Dean Huijsen chu pound maktaduai 50-a lakluh an rem ti.

Spain international Huijsen hi Premier League club ho pawhin lakluh tumin an hel a, club pasarih aṭangin sawmna a hmu. Chelsea, Liverpool, Arsenal leh Newcastle United chu duhtu zingah an tel a, mahse, an rama kir a duh.

Huijsen hian tun season ṭan dawn khan Bournemouth hi a zawm ve chauh a, £50mtd-a lei duh an awm chuan a chhuah theih tur thu a contract-ah hian a ziak tel. Real-in an phalna ang zatin an dawr a, a chhuak dawn ta.

Kum 20 mi centre back man hi Real hian an pe tla nghal vek dawn lo thung. Instalment-in vawi thum pekah an hmang dawn a, Cherries bakah a club hlui Juventus (10%) leh a academy a awmna Malaga (5%) ten sum an dawng ve bawk ang.

Real hian June thlaa khelh tur Club World Cup hmaa Huijsen hi lakluh an duh avangin, mimal thilah pawh an inrem hnai tawh a, he thuziak i chhiar meuh chuan an inrem fel tawh hial mai thei.

Huijsen hi Netherlands-a piang niin, Spain-ah a seilian a, ram pahnih tana inlan thei a nih avangin an inchuh hman. A tawpah Spain a thlang a, March thla khan Netherlands hmachhawnin, ram tana a match hmasa ber a khel.

La Roja manager Luis de la Fuente chuan, "Engemaw harsatna tak a awm a nih loh chuan Huijsen hi eng team tan pawha khel turin a ṭha tawk," a ti a, a dah sang hle.

Huijsen hi Juventus leh AS Roma (loan) ah te a khel hman a, Cherries a pan theih nan hian khatihlaia Roma General Manager, tun season ṭan dawna Bournemouth-in President (Football Operations) atana an lakluh Tiago Pinto chu a ṭangkai hle.

Pinto hian Juve chu defender naupang hi hralh turin a hmin a, a man hi £12.6mtd niin, £15mtd thlenga sang chho thei tura tih a ni a, tunah chuan £50mtd-in an hralh dawn ta.

Huijsen leitu tur Real hian official takin la puang lo mah se, Bayer Leverkusen aṭangin coach Xabi Alonso chu an la lut dawn a, Liverpool defender Trent Alexander-Arnold an la lut dawn bawk.